राहुल गांधींच्या सुरक्षेतील त्रुटी प्रकरणात धक्कादायक माहिती समोर, दिल्ली पोलीस म्हणाले..

नवी दिल्ली, 30 डिसेंबर : भारत जोडो यात्रेतील राहुल गांधींच्या सुरक्षेबाबत काँग्रेसच्या वतीने गृह मंत्रालयाला पत्र लिहिल्यानंतर आता दिल्ली पोलिसांनीही आपला अहवाल गृह मंत्रालयाला सादर केला आहे. काँग्रेस नेत्याच्या पत्रानंतर गृह मंत्रालयाने दिल्ली पोलिसांकडून अहवाल मागवला होता. सूत्रांनी दिलेल्या माहितीनुसार, दिल्ली पोलिसांच्या सर्व युनिट्सकडून अहवाल देण्यात आला आहे. दिल्ली पोलिसांच्या सुरक्षा, वाहतूक आणि विशेष शाखा इत्यादींकडून अहवाल मागवण्यात आला होता. वृत्तानुसार, राहुल गांधींच्या सुरक्षेसाठी दिल्ली पोलिसांनी साध्या गणवेशात मोठ्या प्रमाणात पोलीस तैनात केले होते. त्यांनी राहुल गांधी यांच्यासाठी सुरक्षेचा बंदोबस्त ठेवला होता. मात्र, राहुल गांधी पोलिसांनी केलेली गराडा तोडताना दिसले. 24 डिसेंबर रोजी दिल्लीत भारत जोडो यात्रेचा मार्ग 23 किलोमीटरचा होता.

यापूर्वी, सरकारी अधिकार्‍यांनी गुरुवारी सांगितले की, राहुल गांधींनी 2020 पासून 113 वेळा सुरक्षा प्रोटोकॉलचे 'उल्लंघन' केले असले तरी, दिलेल्या मार्गदर्शक तत्त्वांनुसार 'संपूर्ण' सुरक्षा व्यवस्था करण्यात आली होती. एक दिवसापूर्वी, काँग्रेसने राष्ट्रीय राजधानीत 'भारत जोडो यात्रे' दरम्यान कथित सुरक्षा त्रुटींचा आरोप केला होता. काँग्रेसने बुधवारी केंद्रीय गृहमंत्री अमित शाह यांना लिहिलेल्या पत्रात राहुल गांधींच्या सुरक्षेत त्रुटी असल्याचा दावा केला आणि यात्रेत सहभागी होणाऱ्या गांधी आणि इतरांच्या सुरक्षेची खात्री करण्यासाठी तातडीने पावले उचलण्याची विनंती केली. अधिकाऱ्यांनी सांगितले की, “राहुल गांधींच्या सुरक्षेसाठी मार्गदर्शक तत्त्वांनुसार संपूर्ण व्यवस्था करण्यात आली होती.”

पोलिसांनी आरोप फेटाळले

हे आरोप फेटाळताना अधिकाऱ्यांनी सांगितले की, जेव्हा संबंधित व्यक्ती गाइडलाईन्सचे पालन करते तेव्हाच ही व्यवस्था योग्य कार्य करते. अधिकाऱ्यांनी आरोप केला की राहुल गांधी यांनी अनेक प्रसंगी नियमांचे उल्लंघन केले आणि हे वेळोवेळी त्यांच्या निदर्शनास आणून दिले. अधिकाऱ्यांनी सांगितले की, राहुल गांधी यांनी 2020 पासून 113 वेळा सुरक्षा मार्गदर्शक तत्त्वांचे उल्लंघन केले आहे आणि त्यांना याची माहिती देण्यात आली आहे. राहुल गांधींनी 'भारत जोडो यात्रे'च्या दिल्ली टप्प्यात सुरक्षा मार्गदर्शक तत्त्वांचे "उल्लंघन" केले आणि त्यांना 'Z+' श्रेणी सुरक्षा पुरवणारे केंद्रीय राखीव पोलीस दल (CRPF) हे प्रकरण स्वतंत्रपणे हाताळत आहे, असेही अधिकाऱ्यांनी सांगितले.

वाचा - PM Modi: आईच्या निधनाचं दुःख बाजूला सारुन PM मोदी कर्तव्यावर; सर्व बैठकांना हजेरी, एकही कार्यक्रम रद्द नाही

सुरक्षा दिलेल्या व्यक्तीच्या यात्रेत सीआरपीएफच्या मार्गदर्शक तत्त्वांनुसार राज्य पोलीस आणि सुरक्षा संस्थांच्या समन्वयाने आवश्यक सुरक्षा व्यवस्था केली जाते. धोक्याच्या मूल्यांकनावर आधारित सल्ला गृह मंत्रालयाने राज्य सरकारांसह सर्व संबंधितांना जारी केले आहेत. अधिकाऱ्यांनी सांगितले की 'अ‍ॅडव्हान्स सिक्युरिटी लायझन' (एएसएल) अंतर्गत प्रत्येक दौऱ्यासाठी आगाऊ तयारी देखील केली जाते. ते म्हणाले की 24 डिसेंबर रोजी 'भारत जोडो यात्रे'च्या दिल्ली लेगसाठी, 22 डिसेंबर रोजी सर्व सहभागी असलेल्या ASL चे आयोजन करण्यात आले होते आणि सर्व सुरक्षा मार्गदर्शक तत्त्वांचे काटेकोरपणे पालन करण्यात आले होते.

त्यांनी सांगितले की, दिल्ली पोलिसांनी माहिती दिली आहे की पुरेसे सुरक्षा कर्मचारी तैनात करण्यात आले आहेत. काँग्रेस संघटनेचे सरचिटणीस के.सी. के.सी. वेणुगोपाल यांनी "सरकारने सूडाचे राजकारण करू नये आणि काँग्रेस नेत्यांच्या सुरक्षेची खात्री करावी," असे गृहमंत्री शाह यांना लिहिलेल्या पत्रात म्हटलं आहे. यात्रेत काही "अवैध घटकांच्या" बेकायदेशीर प्रवेशाच्या घटनांचा संदर्भ देत वेणुगोपाल यांनी हे आरोप केले आहेत.