काँग्रेसच्या माजी मुख्यमंत्र्यांना मोठा झटका! यांना घेऊन प्रचार केला तर उमेदवारालाच भुर्दंड

भोपाळ, 30 ऑक्टोबर : बिहार विधानसभा निवडणुका आणि मध्य प्रदेशातल्या पोटनिवडणुकीच्या तोंडावर निवडणूक आयोगाने काँग्रेसला मोठा झटका दिला आहे. काँग्रेसचे ज्येष्ठ नेते आणि माजी मुख्यमंत्री कमलनाथ यांचं स्टार कँपेनर हे स्टेटस आयोगाने रद्दबातल ठरवलं आहे. कमलनाथ यांनी वारंवार आदर्श आचारसंहितेचा भंग केल्याप्रकरणी ही कारवाई करण्यात आली आहे. एवढंच नाही तर कमलनाथ यांना घेऊन कोणी प्रचार केला तर ते ज्या मतदारसंघात प्रचारसभा घेतील तिथल्या उमेदवाराच्या खर्चात त्या सभेचा खर्च धरला जाई, असंही आयोगाने सांगितलं आहे. कमलनाथ यांनी प्रचारादरम्यान महिला उमेदवाराबद्दल वापरलेला आयटेम या शब्दावरून गदारोळ उठला होता. राहुल गांधी यांनीही या प्रकरणी कमलनाथ यांच्या वक्तव्याबद्दल नाराजी व्यक्त केली होती.

If any campaign is done by Kamal Nath from now onwards, the entire expenditure will be borne by the candidate in whose constituency campaign is being undertaken, says Election Commission. https://t.co/M0N1tcfoV7

— ANI (@ANI) October 30, 2020

डबरा मतदारसंघात इमरती देवी या उमेदवार महिलेला उद्देशून कमलनाथ यांनी अपमानास्पद भाषा वापरली. त्यावर भाजपने आक्रमक भूमिका घेत निवडणूक आयोगाकडे तक्रार केली होती. 48 तासांत कमलनाथ यांनी याचं उत्तर द्यावं अशी अपेक्षा होती. पण कमलनाथ यांनी माफी मागितली नाही. राहुल गांधी यांनीसुद्धा "कमलनाथ आमच्या पक्षाचे असले तरी त्यांनी वापरलेली भाषा मला अजिबात पसंत नाही", अशी प्रतिक्रिया दिली होती. यावरही कमलनाथ यांनी माफी न मागता, राहुल गांधी यांचे वैयक्तिक विचार असल्याचं सांगितलं. आता निवडणूक आयोगाने आणखी कठोर कारवाई करत त्यांचा स्टार प्रचारक असल्याचा दर्जा काढून घेतला आहे. स्टार प्रचारकांच्या यादीतल्या नेत्यांचा प्रचारखर्च, त्यांचा प्रवास, राहणं, विमानाचा प्रवास हे पक्षाच्या खात्यात धरता येतं. पण आता कमलनाथ यांना घेऊन कुठल्या मतदारसंघात प्रचार करण्यात आला तर तो खर्च पक्षाच्या नव्हे तर उमेदवाराच्या वैयक्तिक खात्यातून केल्याचं धरलं जाईल. यामुळे उमेदवारावरचा दबाव वाढेल. उमेदवाराला प्रचारावर किती खर्च करायचा यावरसुद्धा आदर्श आचारसंहितेत मर्यादा असल्यामुळे मध्य प्रदेशात कमलनाथ यांची चांगलीच अडचण होणार आहे.

Congress party to move court against Election Commission's revocation of party leader Kamal Nath's star campaigner status: Narendra Saluja, media coordinator for Madhya Pradesh unit of Congress https://t.co/M0N1tcfoV7

— ANI (@ANI) October 30, 2020

दरम्यान नुकत्याच आलेल्या बातमीनुसार, काँग्रेस निवडणूक आयोगाच्या या निर्णयाविरोधात कोर्टात जाणार आहे. काँग्रेसच्या मध्य प्रदेस प्रभागाचे माध्यम समन्वयक नरेंद्र सलुजा म्हणाले, कमलनाथ यांच्या स्टार कँपेनरचा दर्जा काढून टाकल्याप्रकरणी आम्ही कोर्टात दाद मागणार आहत.