कोरोना संकटादरम्यान उघडली केदारनाथ धामची कवाडं; 11 क्विंटल फुलांनी सजलं मंदिर, पाहा VIDEO

देहराडून 17 मे : उत्तराखंडच्या (Uttarakhand) उच्च हिमालयी क्षेत्रात वसलेल्या जगप्रसिद्ध केदारनाथ मंदिराचे दरवाजे (Kedarnath Temple Reopen) सहा महिन्यांनंतर आज सकाळी पाच वाजता उघडण्यात आले आहेत. याच पार्श्वभूमीवर मंदीर 11 क्विंटल फुलांनी सजवण्यात आलं आहे. मात्र, कोरोनाच्या (Coronavirus) पार्श्वभूमीवर मागील वर्षीप्रमाणेच यावर्षीदेखील श्रद्धाळू यासाठी उपस्थित राहू शकले नाहीत. उत्तराखंडचे मुख्यमंत्री तिरथ सिंह रावत यांनी ट्विटरवर याबाबतची माहिती दिली आहे. तिरथ सिंह यांनी लिहिलं, की जगप्रसिद्ध अकरावे ज्योर्तिलिंग भगवान केदारनाथ धामाचे दरवाजे आज सोमवारी पहाटे पाच वाजता विधी आणि पुजा करुन उघडण्यात आले आहेत. मी बाबा केदारनाथ यांच्याकडे सर्वांना निरोगी ठेवण्याची प्रार्थना करतो. तिरथ सिंह यांनी पुढे लिहिलं, की केदारनाथचे मुख्य पुजारी आदरणीय भीमाशंकर लिंगम यांच्या आणि मोजक्या पुजाऱ्यांच्या उपस्थितीमध्ये मंदिरात बाबा केदार यांची नियमित पुजा केली जाईल. माझं असं आवाहान आहे, की भक्तांनी कोरोना महामारीच्या संकटादरम्यान आपल्या घरी राहूनच पुजा करावी.

#केदारनाथ मंदिराचे दरवाजे सकाळी 5 वाजता उघडण्यात आले. pic.twitter.com/RbPv10O2o5

— News18Lokmat (@News18lokmat) May 17, 2021

उद्या म्हणजेच मंगळवारी पहाटे सव्वाचार वाजता चमोलीमधील भगवान बदरीनाथचे दरवाजेही उघडण्यात येतील. कोरोनामुळे इथेदेखील भक्तांना येण्याची परवानगी नसेल. कोरोनाच्या पार्श्वभूमीवर उत्तराखंड सरकारनं लागू केलेल्या नियमांनुसार, केदारनाथ आणि बदरीनाथचे दरवाजे उघडताना पुजारी, देवस्थान बोर्डाचे पदाधिकारी आणि प्रशासकीय अधिकाऱ्यांसह केवळ २५ लोकांना उपस्थित राहायला परवानगी असेल. याआधी शुक्रवारी म्हणजेच १४ मे रोजी यमुनोत्री आणि शनिवारी पाच मे रोजी गंगोत्रीचे दरवाजे खुले करण्याच्या वेळीही हीच व्यवस्था लागू केली गेली होती. उत्तराखंडमधील चारधाम या नावानं प्रसिद्ध असलेल्या केदारनाथ, बदरीनाथ, गंगोत्री आणि यमुनोत्रीचे दरवाजे दरवर्षी सहा महिन्यांच्या प्रतीक्षेनंतर एप्रिल-मे महिन्यात भक्तांसाठी खोलले जातात. मात्र, यंदा यावरही कोरोनाचं संकट आहे. याच पार्श्वभूमीवर यंदा चारधाम यात्रा रद्द करण्यात आली आहे.