UN च्या आमसभेत इम्रान खान यांना सडेतोड उत्तर देणाऱ्या स्नेहा दुबेंचं कनेक्शन थेट पुण्याशी

नवी दिल्ली, 25 सप्टेंबर:  भारताचा अपमान करण्याची किंवा भारताच्या नावाने उगाचच खडे फोडण्याची एकही संधी पाकिस्तानकडून सोडली जात नाही; मात्र भारताकडूनही (India-Pakistan) त्याला तोडीस तोड प्रत्युत्तर दिलं जातं. या वेळी पाकिस्तानचे पंतप्रधान इम्रान खान यांनी संयुक्त राष्ट्रसंघाच्या महासभेत (UNGA) काश्मीरचा (Kashmir Issue) मुद्दा काढून भारतावर टीका केली. मात्र भारताकडून स्नेहा दुबे (Sneha Dubey) या तरुण महिला अधिकाऱ्याने निर्भयपणे सडेतोड उत्तरं दिलं आणि काश्मीर हा निर्विवादपणे भारताचा भाग असल्याचं ठासून सांगितलं. पाकिस्तानच्या दुष्कृत्यांचा पाढाही त्यांनी वाचला. त्यामुळे संयुक्त राष्ट्रसंघाच्या महासभेत भारताला पाण्यात पाहू इच्छित असलेल्या पाकिस्तानचीच नाचक्की झाली. स्नेहा दुबे यांची ओळख करून देणारं वृत्त 'आज तक'ने दिलं आहे. कोण आहेत स्नेहा दुबे? स्नेहा दुबे सध्या संयुक्त राष्ट्रसंघ महासभेत भारताच्या प्रथम सचिव आहेत. त्यांचं सुरुवातीचं शिक्षण गोव्यात झालं. त्यानंतर पुण्यातल्या फर्ग्युसन कॉलेजमधून त्यांनी पदवी घेतली. त्यांचं पदव्युत्तर शिक्षण दिल्लीच्या जवाहरलाल नेहरू विद्यापीठातून झालं. तिथे त्यांनी एमए आणि एमफिल या पदव्या घेतल्या. त्यांच्या कुटुंबातलं कोणीही नागरी सेवेत नाही. मात्र त्यांना यात रस होता. 2012 साली त्यांच्या पहिल्याच प्रयत्नात त्यांनी यूपीएससी (UPSC) परीक्षेत यश मिळवलं होतं. आंतरराष्ट्रीय विषयांमध्ये (International Affairs) विशेष आवड असलेल्या स्नेहा यांनी भारतीय परराष्ट्र सेवेत अर्थात इंडियन फॉरेन सर्व्हिसेसमध्ये (Indian Foreign Services) जाण्याचा निर्णय घेतला. IFS अधिकारी बनल्यानंतर परराष्ट्र मंत्रालयात त्यांची नियुक्ती करण्यात आली. 2014 साली त्यांना माद्रिद इथल्या भारतीय दूतावासात पाठवण्यात आलं. आता त्या संयुक्त राष्ट्रसंघाच्या महासभेत भारताच्या प्रथम सचिव म्हणून कार्यरत आहेत.

Member States are aware Pakistan has established history &policy of harbouring, aiding &actively supporting terrorists.This is a country that has been globally recognised as openly supporting, training, financing &arming terrorists as matter of State policy:First Secy Sneha Dubey pic.twitter.com/6nSS3QvaHh

— ANI (@ANI) September 25, 2021

संयुक्त राष्ट्रसंघाच्या महासभेत नेमकं काय घडलं? संयुक्त राष्ट्रसंघाच्या महासभेत (UNGA) व्हर्च्युअल भाषण करताना पाकिस्तानचे पंतप्रधान इम्रान खान (Pakistan PM Imran Khan) यांनी काश्मीरचा मुद्दा काढला. अलीकडच्या अनेक भाषणात त्यांनी या मुद्द्यावरून भारतावर टीका केली होती. तशीच त्यांनी या भाषणातही भारतावर टीका केली. हेही वाचा- काश्मीरबाबत वक्तव्य करणाऱ्या पाकिस्तानला भारताचा 'करारा जबाब' इम्रान खान यांच्या या भाषणावर 'राइट टू रिप्लाय' (Right To Reply) अर्थात प्रतिसादाच्या अधिकाराचा वापर करून भारताच्या प्रतिनिधी स्नेहा दुबे यांनी पाकिस्तानच्या दुष्कृत्यांचा पाढा वाचला. 'पाकिस्तानच्या सर्वोच्च नेत्याने माझ्या देशाविरुद्ध खोटे आरोप करण्यासाठी आणि दुष्प्रचार करण्यासाठी संयुक्त राष्ट्रसंघाच्या व्यासपीठाचा वापर करण्याची ही पहिलीच वेळ नाही. याच्या साह्याने ते स्वतःच्या देशातल्या वाईट परिस्थितीवरून जगाचं लक्ष विचलित करू इच्छितात. पाकिस्तानात दहशतवादी (Terrorist) मुक्तपणे फिरतात आणि सर्वसामान्य नागरिक, विशेषतः अल्पसंख्याक समुदायाच्या नागरिकांवर अत्याचार केले जातात,' असं स्नेहा दुबे म्हणाल्या. हेही वाचा- T20 World Cup: हार्दिक पांड्याची टीम इंडियात निवड कशी झाली? माजी क्रिकेटपटूनं विचारला प्रश्न  'जम्मू-काश्मीर (J & K) आणि लडाखचा (Ladakh) संपूर्ण भाग हे भारताचे अविभाज्य भाग आहेत आणि यापुढेही राहतील. अवैधपणे पाकिस्तानच्या कब्जात असलेल्या भागांचाही यात समावेश आहे. पाकिस्तानने त्यांच्या अवैधरीत्या ताब्यात असलेली सगळी क्षेत्रं तातडीने मुक्त करावीत, असं आवाहन आम्ही करतो,' असंही स्नेहा दुबे यांनी ठासून सांगितलं. 'अनेक देशांना पाकिस्तानचा इतिहास माहितीच आहे. पाकिस्तान दहशतवाद्यांना पोसतो, आसरा देतो आणि सक्रिपणे त्यांना पाठिंबा देतो. हीच त्यांची नीती आहे. पाकिस्तान हा असा देश आहे, की जो दहशतवाद्यांना पाठिंबा देणारा, त्यांना अर्थसाह्य करणारा आणि त्यांना हत्यारं उपलब्ध करून देणारा देश म्हणून जागतिक पातळीवर ओळखला जातो,' असंही स्नेहा दुबे म्हणाल्या.