पश्चिम बंगालमध्ये गुवाहाटी-बिकानेर एक्स्प्रेस घसरली, घटनास्थळाचा पहिला VIDEO

डोमोहानी, 13 जानेवारी : पश्चिम बंगालमध्ये रेल्वे अपघाताची मोठी घटना घडली आहे. गुवाहाटी-बिकानेर एक्स्प्रेस (Guwahati-Bikaner Express ) पश्चिम बंगालमधील डोमाहानीजवळ रूळावरून घसरली. या अपघातात अनेक जण जखमी झाल्याचं वृत्त आहे. घटनास्थळी पोलीस आणि अग्निशमनदलाचे जवान पोहोचले असून, बचावकार्य सुरू आहे. (Guwahati-Bikaner Express derailed in West Bengal) नेमकं काय घडलं? पश्चिम बंगालच्या जलपाईगुडी परिसरात मैनगुडी येथे बिकानेर एक्स्प्रेसचे तब्बल 12 डब्बे रूळावरून घसरल्याने मोठा अपघात घडला. या अपघातात आतापर्यंत तीन प्रवाशांचा मृत्यू झाल्याची माहिती समोर आली आहे. तसेच अनेक प्रवासी गंभीर जखमी झाल्याचं वृत्त आहे. रेल्वे प्रशासनाचे अधिकारी-कर्मचारी, पोलीस, अग्निशमन दलाचे जवान यांच्याकडून डब्यात अडकलेल्या प्रवाशांना बाहेर काढण्याचं काम युद्धपातळीवर सुरू आहे.

पश्चिम बंगालमध्ये गुवाहाटी-बिकानेर एक्स्प्रेस घसरली pic.twitter.com/GXAnlyOLp9

— News18Lokmat (@News18lokmat) January 13, 2022

पश्चिम बंगालमधील डोमोहानी इथं आज संध्याकाळी ही घटना घडली. संबंधित ट्रेन बिहारच्या पाटणा इथून आसामच्या गुवाहाटी इथं जात असताना मैनागुडी इथं ही दुर्घटना घडली. घटनेची माहिती मिळताच रेल्वेप्रशासनासह पोलीस घटनास्थळी दाखल झाले आहेत. दुर्घटनेत जखमी झालेल्या प्रवाशांना डब्यातून बाहेर काढण्याचं काम युद्धपातळीवर सुरू आहे. (मोठी दुर्घटना ! पश्चिम बंगालमध्ये बिकानेर एक्सप्रेसचा अपघात) ही दुर्घटना आज संध्याकाळी जवळपास सव्वापाचच्या सुमारास घडली. हा अपघात एवढा भयानक होता की, प्रवाशांनी भरलेले चार डबे थेट जमिनीवर, तर एक डबा पाण्यात कोसळला. त्यातून एका प्रवाशाला बाहेर काढल्याचं वृत्त समोर आलं आहे. बिकानेर एक्स्प्रेसला परिसरातील आजूबाजच्या कोणत्याही रेल्वेस्थानकावर थांबा नव्हता. ट्रेन तिथून जात असताना ही दुर्घटना घडली. दरम्यान, जखमींना रुग्णालयात नेण्यासाठी 30 ते 40 रुग्णवाहिका घटनास्थळी रवाना करण्यात आल्या आहेत. तसेच सिलिगुडी इथून एक रिलिफ ट्रेन पाठविण्यात आली आहे. घटनेच्या पार्श्वभूमीवर उत्तर बंगालमधील मेडिकल कॉलेजला अलर्टवर ठेवण्यात आलं आहे.