'गोहत्या थांबवल्या तर जगातील सर्व समस्या संपतील' : गुजरात कोर्ट

अहमदाबाद, 22 जानेवारी : गुरांची अवैध वाहतूक केल्याप्रकरणी गुजरातच्या एका न्यायालयाने एका व्यक्तीला जन्मठेपेची शिक्षा सुनावली असताना गोहत्येवर विचित्र टिप्पणी केली. कायदेशीर वृत्त वेबसाईट लाइव्ह लॉच्या वृत्तानुसार, तापी जिल्हा न्यायालयाच्या प्रधान जिल्हा न्यायाधीशांनी आदेशात म्हटले आहे की, गोहत्या बंद झाल्यास पृथ्वीवरील सर्व समस्या दूर होतील. सत्र न्यायाधीश समीर विनोदचंद्र व्यास यांनी असेही सांगितले की, 'गाईच्या शेणापासून बनवलेल्या घरांवर आण्विक किरणोत्सर्गाचा परिणाम होत नाही आणि गोमूत्राच्या सेवनाने अनेक असाध्य रोग बरे होतात'.

न्यायमूर्तींनी असा दावा केला की, 'धर्माची उत्पत्ती गायीपासून झाली कारण धर्म वृषभ राशीपासून बनला आहे आणि गायीचा पुत्र वृषभ आहे.' न्यायालयाने एका संस्कृत श्लोकाचाही हवाला दिला, ज्यामध्ये म्हटले आहे की जर गायी नामशेष झाल्या तर विश्वाचे अस्तित्वही नष्ट होईल. वेदांचे सर्व सहा भाग गायींमुळे उत्पन्न झाले. गायींना मारणे अस्वीकार्य आहे यावर जोर देऊन न्यायालयाने आणखी दोन श्लोकांचा संदर्भ दिला, ज्यांचे भाषांतर खालीलप्रमाणे केले जाऊ शकते:

जिथे गायी सुखी असतात तिथे सर्व पैसा आणि संपत्ती प्राप्त होते. जिथे गायी दुःखी राहतात तिथे पैसा आणि संपत्ती राहत नाही आणि नाहीशी होते. गाय ही रुद्राची माता, वसूची कन्या, अदितिपुत्रांची बहीण आणि ध्रुपा म्हणजे अमृताचा खजिना आहे. गोहत्या आणि बेकायदेशीरपणे गोवंश वाहून नेण्याच्या घटना सुसंस्कृत समाजासाठी लज्जास्पद असल्याचे वर्णन करून न्यायालयाने पुढीलप्रमाणे टिप्पणी केली.

गाय हा केवळ प्राणी नसून ती एक माता आहे. म्हणूनच तिला आई हे नाव देण्यात आले आहे. गाय हा 68 कोटी पवित्र स्थाने आणि तेहतीस कोटी देवतांचा जिवंत ग्रह आहे. ज्या दिवशी गाईच्या रक्ताचा एक थेंबही पृथ्वीवर पडणार नाही, त्या दिवशी पृथ्वीवरील सर्व समस्या दूर होतील आणि पृथ्वीवर कल्याणाची स्थापना होईल.

वाचा - 'सुप्रीम कोर्टाने संविधान हायजॅक केलं..' कायदा मंत्र्यांचा गंभीर आरोप; माजी न्यायाधीशांचं विधान शेअर

हवामानातील बदलाचाही गोहत्येशी संबंध

न्यायमूर्तींनी गोहत्येला हवामान बदलाशी जोडले. कोर्ट म्हणाले, “आज ज्या समस्या आहेत त्या वाढत्या चिडचिडेपणामुळे आणि गरम स्वभावामुळे आहेत. त्याची वाढ होण्याचे एकमेव कारण म्हणजे गायींची कत्तल. हे पूर्णपणे थांबवल्याशिवाय सात्विक हवामान बदलाचा कोणताही परिणाम होणार नाही. मात्र, न्यायाधीशांनी केलेल्या दाव्याला कोणताही शास्त्रीय आधार नाही.

गेल्या वर्षी ऑगस्टमध्ये घडलेल्या एका घटनेबाबत न्यायालयाने हा निर्णय दिला आहे. गेल्या वर्षी ऑगस्टमध्ये मोहम्मद अमीन आरिफ अंजुम नावाच्या व्यक्तीला 16 हून अधिक गायींची अवैध वाहतूक केल्याप्रकरणी अटक करण्यात आली होती. न्यायालयाने त्याला जन्मठेपेची शिक्षा ठोठावण्याबरोबरच त्या व्यक्तीला पाच लाख रुपयांचा दंडही ठोठावला.