पदवीधर आणि शिक्षक मतदार संघांसाठी भाजपकडून उमेदवारांची नावं जाहीर

मुंबई, 09 नोव्हेंबर : भाजपने (BJP) पदवीधर (Graduate) आणि शिक्षक मतदार संघांच्या (Teacher Legislative Council Elections ) पाचही जागा लढवण्याची तयारी केली आहे. भाजपकडून पदवीधर मतदार संघाच्या निवडणुकीसाठी नावांची घोषणा करण्यात आली आहे. औरंगाबाद पदवीधर मतदारसंघातून शिरीष बोराळकर यांना उमेदवारी जाहीर करण्यात आली आहे. तर  पुणे पदवीधरसाठी संग्राम देशमुख, नागपूर संदीप जोशी  आणि अमरावती शिक्षक मतदारसंघासाठी नितीन धांडे यांना उमेदवारी जाहीर झाली आहे. भाजपचे उमेदवार औरंगाबाद पदवीधर मतदारसंघ - शिरीष बोराळकर पुणे पदवीधर - संग्राम देशमुख नागपूर पदवीधर - संदीप जोशी अमरावती शिक्षक मतदारसंघ - नितीन धांडे महाविकास आघाडीचा फाॅर्म्युला ठरेना! तर दुसरीकडे  पदवीधर आणि शिक्षक विधान परिषद  निवडणुकीवरून महाविकास आघाडीत अजूनही रस्सीखेच सुरूच आहे.  विधानपरिषदेच्या निवडणुका जाहीर झाल्या आहे. पण अजूनही जागांचे वाटपाबाबत कोणताही निर्णय ठरलेला नाही. 12 तारखेपर्यंत अर्ज भरण्याची शेवटची तारीख आहे. पण अजूनही पडद्याआड कोणतीही हालचाल झालेली नाही. त्यामुळे आता महाविकास आघाडीत जागा वाटपाबाबत नेत्यांमध्ये चर्चा करून लवकरच तोडगा काढण्याची शक्यता आहे. अमरावती शिक्षक मतदारसंघातील विद्यमान आमदार श्रीकांत देशपांडे यांना शिवसेनेकडून उमेदवारी अपेक्षा आहे.  पण त्यांच्या उमेदवारीला काँग्रेसने विरोध केला आहे.  स्थानिक काँग्रेसकडून ही जागा काँग्रेसच्या पारड्यात यावी अशी मागणी केली जात आहे. तर पुणे शिक्षक मतदारसंघातील जागा काँग्रेसला हवी आहे. याआधी ही जागा आघाडी सरकार असताना  काँग्रेसकडे होती. या जागेवर दत्तात्रेय सावंत हे आता आमदार आहेत. दत्तात्रेय सावंत यांनी अपक्ष निवडणूक लढवण्याची इच्छा व्यक्त केली असून  महाविकास आघाडीने पाठिंबा द्यावा अशी मागणी सावंत यांनी केल्याची माहिती समोर आली आहे.