महिलांच्या बँक खात्यामध्ये 2.20 लाख जमा करतंय सरकार? वाचा काय आहे सत्य

नवी दिल्ली, 16 ऑक्टोबर : व्हिडीओ प्लॅटफॉर्म असणाऱ्या YouTube वर सध्या एक व्हिडीओ सध्या खूप व्हायरल होत आहे. ज्यामध्ये असा दावा केला जात आहे की, केंद्र सरकारकडून सर्व महिलांच्या खात्यामध्ये 'पंतप्रधान नारी शक्ती योजने'अंतर्गत 2 लाख 20 हजार रुपये ट्रान्सफर करण्यात येत आहेत. जर असा कोणताही मेसेज तुम्हाला मिळाला असेल तर त्यावर विश्वास ठेवू नये. तुम्ही अशा मेसेजपासून सतर्कता बाळगणे गरजेचे आहे. केंद्र सरकारचे अधिकृत ट्विटर हँडल असणाऱ्या पीआयबी (Press Information Bureau) फॅक्ट चेकने हा दावा खोटा असल्याचे ट्वीट शेअर केले आहे. पीआयबीने या व्हिडीओची पडताळणी करून दावा फेटाळला आहे, हा मेसेज बनावट असल्याचे PIB ने म्हटले आहे. PIB फॅक्ट चेकमध्ये माहिती आली समोर पीआयबी फॅक्ट चेकच्या ट्विटर हँडलच्या माध्यमातून सोशल मीडियावर व्हायरल होणाऱ्या खोट्या बातम्यांचा पर्दाफाश केला जातो. सामान्य नागरिकांमध्ये जागरुकता पसरवण्याचे काम पीआयबीच्या माध्यमातून केले जाते. याप्रकारेच या योजनेबाबत पीआयबीकडून माहिती देण्यात आली आहे. अशी कोणतीच योजना नसल्याचे पीआयबीने म्हटले आहे.

दावा: एक #YouTube वीडियो में यह दावा किया जा रहा है कि केंद्र सरकार सभी महिलाओं के बैंक खातों में 'प्रधानमंत्री नारी शक्ति योजना' के तहत 2 लाख 20 हज़ार रूपए की राशि जमा कर रही है।#PIBFactCheck: यह दावा फर्जी है। केंद्र सरकार द्वारा ऐसी कोई योजना नहीं चलाई जा रही है। pic.twitter.com/LPEHGvzh2C

— PIB Fact Check (@PIBFactCheck) October 15, 2020

पीआयबीचे असे म्हणणे आहे की, जर तुमच्याकडे कोणताही व्हायरल मेसेज आला आणि त्यामध्ये कोणत्याही लिंकवर क्लिक करण्याचे सांगण्यात आले तर तसे अजिबात करू नका. सर्वात आधी त्या मेसेजची विश्वासार्हता तपासून घ्या आणि त्यानंतरच त्यावर विश्वास ठेवा. तुम्ही एखाद्या बनावट मेसेज किंवा लिंकवर क्लिक केल्यास ऑनलाइन फ्रॉड होण्याची शक्यता अधिक असते. पीआयबी फॅक्ट चेक काय काम करते? PIB Fact Check सरकारच्या पॉलिसी/स्कीम्स/विभाग/मंत्रालयं यासंदर्भातील चुकीच्या सूचनांचा लोकांमध्ये प्रसार होऊ नये याकरता काम करते. सरकारसंबंधित कोणतीही बातमी खरी आहे की खोटी हे जाणून घेण्यासाठी तुम्ही PIB Fact Check ची मदत घेऊ शकता. कोणतीही व्यक्ती PIB Fact Check ला संशयास्पद बातमीचा किंवा पोस्टचा स्क्रीनशॉट, ट्वीट, किंवा फेसबुक पोस्ट 918799711259 या WhatsApp क्रमांकावर पाठवू शकता. त्याचप्रमाणे pibfactcheck@gmail.com या मेल आयडीवर मेल करून देखील तुम्ही सविस्तर माहिती घेऊ शकता.