GST दर रचनेत मोठा बदल होण्याची शक्यता, 12 आणि 18 टक्क्यांचा मिळून एकच 15 टक्क्यांचा स्लॅब येणार

मुंबई, 21 मार्च : जीएसटी दर रचनेत (GST rate structure) मोठा बदल होण्याची शक्यता आहे. यामध्ये बदल सुचवण्यासाठी स्थापन करण्यात आलेली राज्यमंत्र्यांची समिती 12 टक्के आणि 18 टक्के स्लॅब (Tax slab) एकत्र करून 15 टक्के स्लॅब सुचवू शकते, अशी चर्चा आहे. म्हणजे 12 आणि 18 टक्के स्लॅब काढून त्यांच्या जागी 15 टक्‍क्‍यांचा स्लॅब येईल. मात्र महागाईच्या (Inflation) चिंतेमुळे किमान 5 टक्के ते 8 टक्के दर वाढवण्याच्या प्रस्तावाबाबत पॅनेल सावध आहे. इकॉनॉमिक टाइम्सने दिलेल्या वृत्तात या गोष्टी समोर आल्या आहेत. GST दर सुलभ करण्यासाठी GoM ची स्थापना GST काउन्सिलने मंत्री गटाची (GoM) स्थापना केली होती, जी GST दरांचे सरलीकरण, वर्गीकरणाशी संबंधित विवादांचे निराकरण करण्यासाठी आणि GST महसूल वाढवण्यासाठी आपल्या सूचना देईल. जीएसटी काऊन्सिलच्या बैठकीत मंत्री गटाच्या शिफारशींवर चर्चा केली जाईल आणि त्यानंतर अंतिम निर्णय घेतला जाईल. पुढील आठवड्यात बैठक होऊ शकते सूत्रांच्या हवाल्याने, अहवालात असे लिहिले आहे की या GoM ची बैठक पुढील आठवड्यात होण्याची शक्यता आहे, ज्यामध्ये दरांबाबत अंतिम निर्णय घेतला जाईल आणि शिफारसी केल्या जातील. अहवाल आणि राज्याच्या महसूल स्थितीवर विचार करण्यासाठी GST परिषद पुढील महिन्याच्या सुरुवातीला बैठक घेऊ शकते. आता जीएसटी दराची रचना काय आहे? जीएसटीमध्ये सध्या 5 टक्के, 12 टक्के, 18 टक्के आणि 28 टक्के दरांसह 4-स्तरीय संरचना आहे. तसेच, महागड्या धातूंसारख्या काही वस्तूंसाठी विशेष दर आहेत. या सर्व प्रकारामुळे ही व्यवस्था गुंतागुंतीची झाली आहे. जुलै 2017 मध्ये जीएसटी लागू झाला तेव्हा महसूल तटस्थ दर सुमारे 15.5 टक्के होता. महसूल तटस्थ दर म्हणजे जीएसटी लागू करताना राज्यांना किंवा केंद्राचे कोणतेही नुकसान होणार नाही असा दर. मात्र, अनेक वस्तूंवरील सूट आणि दर कमी केल्यामुळे ते 11.6 टक्क्यांपर्यंत खाली आले आहे.

• Follow us on