'सही पकडे है...' संजय राऊतांच्या 'ACP प्रद्युम्न'ला चित्रा वाघांचे 'भाभीजी' स्टाईल प्रत्युत्तर

मुंबई, 24 एप्रिल : अनिल देशमुखांवर सीबीआयकडून होत असलेल्या कारवाईच्या मुद्द्यावरून आता नेत्यांमध्ये ट्विटरवॉर रंगायला सुरुवात झाली आहे. सीबीआयच्या धाडी आणि अनिल देशमुखांना ताब्यात घेतल्यानंतर संजय राऊत यांनी ट्विट करत टिव्ही वरचं गाजलेलं पात्र एसीपी प्रद्युम्नच्या स्टाईलमध्ये दया, कुछ तो गडबड जरूर है, असं म्हटलं होतं. त्यावर भाजपच्या चित्रा वाघ यांनीही त्यांना त्याच स्टाईलमध्ये उत्तर दिलं. टिव्ही वर गाजलेल्या भाभीजीच्या स्टाईलमध्ये त्यांनी, सही पकडे है... म्हणत राऊतांच्या टीकेला उत्तर दिलं आहे. (वाचा -मोठी बातमी, अनिल देशमुखांवर दिल्लीमध्ये गुन्हा दाखल, FIR मध्ये धक्कादायक माहिती!) अनिल देशमुख यांच्यावर सीबीआयनं कारवाईचा धडाका लावला आहे. त्यांच्या घरावर सीबीआयनं धाडी टाकल्यानंतर त्यांच्या विरोधात एफआयआर दाखल करण्यात आला. तसंच त्यांना ताब्यातही घेण्यात आलं. त्यानंतर महाविकास आघाडीच्या अनेक नेत्यांनी यावरून केंद्रावर टीका केली. शिवसेना खासदार संजय राऊ यांनी ट्विट करत, यावर टीका केली. राऊत यांनी ट्विट करताना टीव्हीवर गाजलेल्या सीआयडी मलिकेतील एसीपी प्रद्युम्न यांचा प्रचंड गाजलेला दया.. कुछ तो गडबड है असा डायलॉग वापरला. सीबीआयच्या कारवाईवर संशय घेणारं असं त्यांचं ट्विट होतं.

कुछ तो गडबड है... मा.उच्च न्यायालयाने फक्त प्राथमिक चौकशीचे आदेश देत अहवाल सादर करा असे सीबीआयला सांगीतले होते. अनिल देशमुखावर धाडी. एफ.आय. आर..वगैरे अतिरेक आहे. हा सर्व प्रकार न्याय व तर्कसंगत दिसत नाही.दया..कुछ तो गडबड जरूर है.

— Sanjay Raut (@rautsanjay61) April 24, 2021

यानंतर काही वेळातच चित्रा वाघ यांनी संजय राऊतांच्या आरोपांना प्रत्युत्तर दिलं. तपासात गडबड आढळल्यास कारवाई करण्याचे आदेश हायकोर्टानंच दिल्याचं चित्रा वाघ यांनी स्पष्ट केलं. हे उत्तर देताना चित्रा वाघ यांनीही संजय राऊत यांना त्यांच्याच स्टाईलमध्ये उत्तर दिलं. संजय राऊतांनी एसीपी प्रद्युम्नचा डायलॉग मारला तर चित्रा वाघ यांनाही टिव्ही मालिकेत गाजलेल्या भाभीजीचा, सही पकडे है... हा डाय लॉग आठवला आणि त्यांनी लगेचच तसं प्रत्युत्तर दिलं.

सही पकडे है.... कुछ तो नही......यहाँ तो बहुत कुछ गडबड है

म्हणूनच माननीय हायकोर्टानं तपासात काही 'गडबड' वाटल्यास कारवाई करण्याचे आदेश #CBI ला दिले आहेत आणि आता दया चा न्यायव्यवस्थेवरही विश्वास नाही असं म्हणायचयं का ?? जर कुणी काही केलचं नसेल तर नेमकी एव्हढी भिती आहे तरी कशाची pic.twitter.com/K0DgOsUQoV — Chitra Kishor Wagh (@ChitraKWagh) April 24, 2021

चित्रा वाघ यांनी यावेळी सत्ताधारी महाविकास आघाडीवर राऊतांच्या ट्विटला धरूनही टीका केली. गडबड केली म्हणूनच #CBI आली बडबड न करता न्यायालयाचा आदेश व्यवस्थित वाचावा जेणेकरून न्यायव्यवस्थेची तर्कसंगतेचा आपणास बोध होईल, असं म्हणत त्यांनी न्यायालयाच्या आदेशाचे फोटो पोस्ट केले. तसंच जर कुणी काही केलचं नसेल तर नेमकी एव्हढी भिती आहे तरी कशाची, अशा टोलाही त्यांनी लगावला.

“गडबड” केली म्हणूनच #CBI आली आणि आता “बडबड” न करता न्यायालयाचा आदेश व्यवस्थित वाचावा जेणेकरून न्यायव्यवस्थेची तर्कसंगतेचा आपणास बोध होईल pic.twitter.com/ttq5zYQpYq

— Chitra Kishor Wagh (@ChitraKWagh) April 24, 2021

एकूणच अनिल देशमुख यांच्या प्रकरणावरून आता पुन्हा सत्ताधारी आणि विरोधक एकमेकांसमोर उभे ठाकलेले पाहायला मिळत आहे. मात्र दरवेळी फक्त प्रचारात या नेत्यांबरोबर दिसणारे सेलिब्रिटी आता आरोप प्रत्यारोप करतानाही या नेत्यांबरोबर असल्याचं पाहायला मिळत आहे. त्यामुळं हा सामना चांगलाच रंगणार हेही नक्की.