ठाकरेंच्या मालमत्तेची चौकशी सुरू, हायकोर्टात याचिका करणाऱ्या गौरी भिडे कोण आहेत?

मुंबई, 19 ऑक्टोबर : उद्धव ठाकरे आणि त्यांच्या कुटुंबाने बेहिशोबी मालमत्ता जमा केल्याचा आरोप करत मुंबई उच्च न्यायालयात याचिका दाखल करण्यात आली होती. गौरी भिडे यांनी ठाकरेंच्या संपत्तीची चौकशी करावी, अशी मागणी करणारी याचिका हायकोर्टात दाखल केली. आता शिवसेना पक्षप्रमुख उद्धव ठाकरे आणि कुटुंबियांच्या मालमत्तेची प्राथमिक चौकशी मुंबई पोलिसांकडून सुरू झाली आहे. राज्य सरकारने याबाबत हायकोर्टात माहिती दिली आहे. याचिकेतले मुद्दे प्रबोधन प्रकाशन प्रायव्हेट लिमिटेड आणि उद्धव ठाकरे यांच्या उत्पन्नाचे नेमकं स्त्रोत काय आहेत? हा प्रश्न त्यांनी याचिकेद्वारे उपस्थित केला. यासोबतच कोरोना काळात सामना या वृत्तपत्राला इतका फायदा कसा काय झाला? हा प्रश्नही याचिकेत विचारण्यात आला आहे. उद्धव ठाकरे मुख्यमंत्री आणि आदित्य ठाकरे पर्यावरणमंत्री असताना 2020 ते 2022 या कोरोना काळात सामना वृत्तपत्राचा टर्नओव्हर 42 कोटी रुपये इतका होता, ज्यात झालेल्या साडे अकरा कोटी रुपयांच्या नफ्यावरदेखील प्रश्न उपस्थित करण्यात आले आहेत. शिवाय उद्धव ठाकरे कुटुंबाच्या उत्पन्नाचा नेमका स्त्रोत काय? असा सवाल विचारताना त्यांच्या उत्पन्नाच्या स्त्रोताची चौकशी व्हावी, अशी मागणी या याचिकेत करण्यात आली आहे. आदित्य ठाकरेंची प्रतिक्रिया दरम्यान या याचिकेवर आदित्य ठाकरे यांनी प्रतिक्रिया दिली आहे. आमची संपत्ती पाहायची होती, तर दसरा मेळाव्यात दिसली असती. लोकांचं प्रेम आहे तीच आमची संपत्ती आहे, असं आदित्य ठाकरे म्हणाले.

गौरी भिडेंची याचिका गौरी भिडे यांनी ठाकरेंच्या संपत्तीची चौकशी करावी, अशी मागणी करणारी याचिका हायकोर्टात दाखल केली आहे. ‘2019 पासून अनेक गोष्टी समोर आल्या आहेत. पब्लिक डोमेनवर काही गोष्टी आढळल्या, त्यावरून मी याचिका केली. मी अनेक वकिलांची भेट घेतली, पण कुणी हवा तसा प्रतिसाद दिला नाही. म्हणून मी स्वत:च याचिकेवर युक्तीवाद करणार आहे. मी 11 जुलैला तक्रार केली आणि 26 जुलैला रिमायंडर तक्रार दाखल केली, पण पोलिसांनी काहीही न केल्यामुळे मी मुंबई उच्च न्यायालयात धाव घेतली,’ असं गौरी भिडे म्हणाल्या. कोण आहेत गौरी भिडे? गौरी भिडे या प्रकाशक आहेत, त्यांच्या आजोबांचं ‘राजमुद्रा’ नावाचं प्रकाशन आहे. सामना आणि मार्मिकच्या विक्रीतून एवढी संपत्ती गोळा करणं अशक्य असल्याचा आरोप गौरी भिडे यांनी केला आहे. आपलाही हाच व्यवसाय असून दोघांच्या उत्पन्नात एवढा फरक कसा? असा सवाल गौरी भिडे यांनी विचारला आहे.

• Follow us on