नाशिक पदवीधर निवडणुकीत घडामोडींना वेग! सत्यजित तांबे पहिल्यांदाच भाजप नेत्याच्या भेटीला

नाशिक, 28 जानेवारी : नाशिक पदवीधर मतदार संघाच्या निवडणुकीला अवघे दोन दिवस राहिले आहे. अशात आता घडामोडींना वेग आल्याचे पाहायला मिळत आहे. काँग्रेसचे बंडखोर अपक्ष उमेदवार सत्यजित तांबे यांनी पहिल्यांदाच भाजप नेत्याची भेट घेतल्याची माहिती समोर आली आहे. शुक्रवारी (27 जानेवारी) भाजपचे प्रदेशाध्यक्ष चंद्रशेखर बावनकुळे यांनी नागपूरमध्ये बोलत नाशिक पदवीधर निवडणुकीत तांबे यांना पाठिंबा देण्याचे स्पष्ट संकेत दिले होते. त्यानंतर ही भेट महत्त्वाची मानली जात आहे.

सत्यजित तांबे यांनी घेतली भाजप शहर जिल्हाध्यक्षांची भेट

नाशिक पदवीधर निवडणुकीतील अपक्ष उमेदवार सत्यजित तांबे यांनी आज अहमदनगरच्या भाजप शहर जिल्हाध्यक्षांची भेट घेतली. सत्यजित तांबे पहिल्यांदाच भाजप नेत्याच्या भेटीला गेल्याचं समोर आलं आहे. भाजपचे शहर जिल्हाध्यक्ष भैया गंधे आणि सत्यजित तांबे यांची भेट झाली. सत्यजित तांबे यांची प्रचार सभा झाल्यानंतर शहरातील भाजप कार्यालयाजवळ दोघांची भेट झाल्याची माहिती समोर आली आहे.

वाचा - शिंदे-भाजपला धडकी भरवणारे प्रकाश आंबेडकरांचे विधान, राष्ट्रवादी-काँग्रेसलाही दिला सल्ला

..तर सत्यजित तांबे यांना पाठिंबा : चंद्रशेखर बावनकुळे

नाशिकमधील भाजपच्या स्थानिक नेत्यांनी सत्यजित तांबे यांना पाठिंबा देण्याचा निर्णय घेतला असेल तर त्याला माझा ना नसेल, भाजपची मत विभाजित होणार नाही ती एकालाच मिळेल. त्यामुळे भाजपची मत निर्णायक ठरतील, असं मत चंद्रशेखर बावनकुळे यांनी न्युज 18 लोकमत सोबत बोलताना सांगितलं. त्यामुळे सत्यजित तांबे यांना भाजप पाठिंबा देईल, असे स्पष्ट संकेत आता भाजपकडून मिळाले आहेत. या संदर्भात स्थानिक नेते हे बैठक घेऊन कोणत्या अपक्षाला मतदान करायचा याचा निर्णय घेईल, आम्ही अपक्षाला मतदान करणार असा निर्णय भाजप आणि मुख्यमंत्री एकनाथ शिंदे गटाकडून घेतला आहे. मात्र, शुभांगी पाटील यांना मतदान करणार नाही, असेही बावनकुळे यांनी सांगितले.

बाळासाहेब थोरांतांच्या अडचणीत वाढ?

सत्यजित तांबे हे काँग्रेस नेते डॉ. सुधीर तांबे यांचे पुत्र आहेत. तर काँग्रेसचे नेते बाळासाहेब थोरात यांचे भाचे आहेत. सत्यजित तांबे हेदेखील काँग्रेसचे युवा नेते म्हणून प्रसिद्ध होते. पण नाशिक पदवीधर मतदारसंघाच्या निवडणुकीत ऐनवेळी तांबे पिता-पुत्रांनी वेगळा निर्णय घेतला. महाविकास आघाडीतर्फे डॉ. सुधीर तांबे यांना एबी फॉर्म देण्यात आला होता. पण डॉ. सुधीर तांबे यांनी उमेदवारी अर्ज भरण्यास नकार दिला. तर सत्यजित तांबे यांनी अपक्ष म्हणून अर्ज भरला. तांबे यांच्या या निर्णयामागे भाजपची खेळी असल्याचं म्हटलं जात होतं. देवेंद्र फडणवीस यांच्या सूचक वक्तव्याचाही दुजोरा दिला जात होता. मात्र, अद्यापपर्यंत भाजपने त्यांना उघडपणे पाठिंबा दिला नव्हता.