)
धनंजय दळवी, प्रतिनिधी मुंबई, 9 सप्टेंबर : सध्याच्या काळात आपल्या जवळच्या व्यक्तींना मदत करण्यापूर्वी देखील अनेकदा विचार करणारी मंडळी आहेत. प्राण्यांचा विचार करणे ही तर दूरची गोष्ट आहे. प्राण्यांना मारणे, त्यांच्याशी गैरवर्तन करणे यासारख्या घटना वेगवेगळ्या भागातून समोर येत आहेत. माणूस आपले दु:ख व्यक्त करू शकतो. पण, मुक्या प्राण्यांना तसं करता येत नाही. त्यामुळे त्यांचे हाल आणखी वाढतात. मुंबईजवळच्या वसईमध्ये एक तरुणी या प्राण्यांची पालक बनली आहे. 100 हून जास्त कुत्र्यांची आई वसईमध्ये राहणारी हरसिमरन वालिया ही 22 वर्षांची तरुणी 100 पेक्षा जास्त कुत्र्यांची काळजी घेत आहे. हरसमिरन ही रस्ते अपघातात किंवा अन्य कारणांनी जखमी झालेल्या प्राण्यांसाठी बचाव केंद्र चालवते. ती 5 वर्षाची होती तेव्हापासून तिला या प्राण्यांचा लळा लागलाय. विशेषत: जखमी तसच भटक्या कुत्र्यांवर तिचं मोठं प्रेम आहे. ती त्यांना कुटुंबातील सदस्य मानते.
‘मी माझा टिफीन त्यांच्यासोबत शेअर करत असे. हे प्राणी देखील आपल्यासारखेच आहेत. त्यांनाही आपल्यासारखीच तहान-भूक लागते. सुरुवातीला माझ्या घरात चार कुत्री होती. हळूहळू ही संख्या वाढत गेली. ही संख्या वाढू लागतात आम्हाला समाजाकडून वेगळी वागणूक मिळू लागली. आम्ही आमचं घर विकलं. गेल्या अनेक वर्षांपासून आम्ही वसई परिसरात भाड्याच्या घरात राहतो. ही घरं देखील आम्हाला वारंवार बदलावी लागली आहेत. नवीन घर मिळवतानाही मोठा त्रास होतो,’ असं हरसिमरननं सांगितलं. तुमच्या कुत्र्याला सोडून बिनधास्त फिरायला जा, ‘इथं’ घेतली जाते शाही काळजी, Video हरसमिरनचं संपूर्ण कुटुंब आता या कामात मदत करत आहे. प्राण्यांची काळजी घेण्यासाठी हरसिमरनने नोकरीही सोडली. सध्या तिच्या घरात 100 हून जास्त कुत्री, 10 पेक्षा जास्त मांजरी राहतात. हरसिमरनचं कुटुंब त्यांच्या जेवणाचा आणि औषधांचा खर्च करतात. ‘मी सोशल मीडियावर सक्रीय आहेय. त्या माध्यमातूनही मी प्राण्यांची माहिती देत असते. त्याचबरोबर सर्वांना मदतीचं आवाहन करते. समाजातील दानशूर मंडळींकडून मिळणारी मदत हा या खर्चाचा मोठा स्रोत आहे,’ असं तिनं सांगितलं. हरसिमरनचं मॉडेल होण्याचं स्वप्न होतं. पण, ते सोडून ती आता शेल्टर होम चालवत आहे. काही सेवाभावी संस्था, प्राणी मित्र तिला या कामासाठी आर्थिक मदत करत असतात. तुम्हाला मदत करायची नसेल तर करू नका, पण या प्राण्यांना त्रास देऊ नका, असं आवाहन हरसिमरननं केलंय.
+6
फोटो
