FB Live करत संभाजीराजेंनी शिवप्रेमींना केलं 'हे' आवाहन, तर राज्य सरकारला पुन्हा दिला इशारा

सातार, 03 जून : भाजप खासदार संभाजीराजे छत्रपती (Sambhajiraje Chhatrapati) यांनी शिवराज्याभिषेक दिन सोहळ्याच्या पार्श्वभूमीवर शिवप्रेमींशी फेसबूक लाईव्हच्या (FB Live) माध्यमातून संवाद साधला. शिवराज्याभिषेक दिनासाठी (Shivrajyabhishek Din) कोरोनाच्या पार्श्वभूमीवर गर्दी न करण्याचं आवाहन संभाजीराजेंनी यावेळी केलं आहे. कोरोनाच्या संकटात जीव धोक्यात घालू नका. 'शिवराय मनामनांत - शिवराज्यभिषेक दिन घराघरांत' या भावनेतून घरोघरी शिवराज्यभिषेक दिन साजरा करण्याचं आवाहन संभाजीराजे छत्रपती यांनी केलं. यावेळी मराठा समाजाच्या (maratha reservation) मागण्यांवरून संभाजीराजे यांनी सरकारला पुन्हा इशारा दिला आहे. मराठा समाजाला गृहित धरू नका आम्ही भूमिकेवर ठाम आहोत, असं संभाजीराजे छत्रपती यांनी म्हटलं आहे.

काय म्हणाले संभाजीराजे...

संभाजीराजे छत्रपती यांनी प्रामुख्यानं शिवप्रेमींनी 6 जूनला रायगडावर शिवप्रेमींची गर्दी होऊ नये म्हणून त्यांनी घरीच शिवराज्याभिषेक सोहळा साजरा करण्याची विनंती केली. 2007 पासून आपण सगळ्यांनीच शिवराज्यभिषेक सोहळ्याला उत्सवाचं स्वरुप दिलं आहे. शिवरायांचा राज्याभिषेक सोहळा राष्ट्रीय उत्सव व्हावा ही माझी मनापासून इच्छा आहे. पण गेल्यावर्षी कोरोनाची पहिली लाट होती म्हणून उत्सव झाला नाही, पण आपण परंपरा पाळली. गेल्यावर्षी लोकांना मी घरीच राहाण्याची विनंती केली तर लोकांनीही गेल्यावर्षी ऐकलं त्यांचे मी आभार मानतो असं संभाजीराजे छत्रपती म्हणाले. यंदाची परिस्थितीही तशीच आहे. त्यामुळं 'शिवराय मनामनांत - शिवराज्यभिषेक दिन घराघरांत' या भावनेतून घरीच हा सोहळा साजरा करण्याचं आवाहन शिवप्रेमींना संभाजीराजेंनी केलं आहे.

जीवावर खेळण्याची वेळ नाही..

मराठा आरक्षणाबाबतच्या पत्रकार परिषदेत मी सरकारला रायगडावरून भूमिका मांडेल असा इशारा दिला. त्यामुळं हजारो शिवभक्तांना याठिकाणी आपण आंदोलन सुरू करणार असं वाटलं. त्यामुळं त्यांना रायगडला येण्याची इच्छा असल्यानं शिवभक्तांनी रायगडाकडे कूच करण्याची मोहीम सुरू केली, शिवभक्तींनी रायगडला जायचं ठरवलं. पण मीही शिवभक्त आहे आणि सोबतच शिवराय आणि शाहू महाराजांचा रक्ताचा आणि विचारांचा वारसदार आहे. सगळे रायगडावर आले आणि कोरोनाचं संकट यामुळं वाढलं तर आपण उत्तर कसं देणार. त्यामुळं माझी सगळ्यांना हात जोडू विनंती आहे सध्या घरीच राहा. जीवावर खेळण्याची सध्याची वेळ नाही, आपल्या कुटुंबाचा विचार करा अशी विनंती संभाजीराजे यांनी केली.

भूमिकेविषयी शंका नको..

मी सर्वांना घरीच शिवजयंती साजरी करा सांगत असलो तरी मराठा समाजाच्या आरक्षणाच्या मुद्द्यावरून ठाम असल्याचं संभाजीराजे म्हणाले. 28 मे रोजी सरकारकडं आपण ज्या पाच मागण्या केल्या त्या अद्याप सरकारनं पूर्ण केलेल्या नाहीत. मुख्यमंत्री, उपमुख्यमंत्री यांनी फोन केले पण मागण्या मान्य केल्या नाही. सरकारकडे अजूनही पाच तारखेपर्यंत वेळ आहे. पण या मागण्या मान्य केल्या नाही तर रायगडावरून आंदोलनाची भूमिका मांडणार असल्याचा पुनरुच्चार संभाजीराजे यांनी केला. मराठा समाजाला गृहित धरू नका, आमची भूमिका ठाम आणि कायम आहे. रायगडावरून लाखो बांधवांचा आवाज मांडणारच असंही संभाजीराजे म्हणाले.

कुंभमेळ्याच्या गर्दीवर टीका... 

संभाजीराजे छत्रपती यांनी शिवभक्तांनी घरीच राहण्याची विनंती करताना कुंभमेळ्याच्या गर्दीवर टीका केली. कुंभमेळ्यात ज्यापद्धतीनं गर्दी झाली तशी आपल्याला करायची नाही. किंवा मेट्रोच्या उद्घानात झाली तशीही गर्दी आपल्याला करायची नाही. आपणही तसं केलं तर शिवभक्तांमध्ये आणि इतरांमध्ये फरक कसा राहील, असं म्हणत संभाजीराजेंनी विनंती करताना टीकाही केली.