)
कोल्हापूर,2 जानेवारी : स्वस्तात मस्त मिळणारे पदार्थ सर्वांनाच आवडत असतात. पण जर हे पदार्थ स्वस्त आणि आरोग्यास उत्तम असे असतील तर ग्राहक नक्कीच गर्दी करतात. याचाच आधार घेत कोल्हापुरात एके ठिकाणी स्वस्त इडली मिळू लागली आहे. चक्क चहाच्या पैशात या इडली सांबार नाश्त्याचा आस्वाद कोल्हापूरकरांना घेता येत आहे. कोल्हापुरातील विशाल अशोक मलबारी हे गेल्या 5-6 वर्ष चहाचा गाडा चालवत होते. यामध्ये त्यांची बहीण त्यांना सहाय्य करते. कोरोनाचा काळ आला आणि सर्वांचेच आयुष्य पालटून गेले. यात विशाल यांना चहाचा गाडा बंद करावा लागला. पण खचून न जाता विशाल यांनी आपल्याच नावाचा चहाचा ब्रँड बनवण्याचे ठरवले. त्याच विचाराने त्यांनी मलबारी अमृततुल्य हे चहाचे दुकान सुरू केले.
…आणि विचार करून इडली 10 रुपयांना द्यायला सुरुवात केली या ठिकाणी चहा प्यायला येणाऱ्या ग्राहकांनी विशाल यांना नाश्ता ठेवण्याची विनंती केली होती. त्यामुळे विचार करून विशाल यांनी सर्वांना परवडेल अशा दरात फक्त 10 रुपयांना इडली द्यायला सुरुवात केली. एका प्लेट मध्ये एक इडली, सांबार आणि चटणी आम्ही देतो. नुकतीच सुरू केलेली ही संकल्पना सध्या लोकांना आवडू लागली आहे, असे विशाल यांनी सांगितले. इडली 10 रुपयांना कशी परवडते? सध्या फुल चहा जरी प्यायचा म्हटले तर काही ठिकाणी 12 ते 15 रुपये घेतात. म्हणूनच आम्ही कमीत कमी पैशात नाश्ता सुरू करायचा विचार करत होतो. म्हणून आम्ही इडलीची किंमत फक्त 10 रुपये ठेवली. खरंतर फक्त 10 रुपये असल्यामुळे भरपूर गर्दी होते. पण आम्हाला थोडाफार कमीच नफा मिळतो. मात्र यातून लोकांना पोटाला जर दोन घास मिळत असतील, तर त्यातच आम्हाला समाधान आहे, असे मत विशाल यांनी व्यक्त केले आहे.
दुकानाचा पत्ता हॉटेल यश शेजारी, जयाबाई हविरे चौक सिग्नल जवळ, लक्ष्मी नारायण नगर, कदमवाडी, कोल्हापूर
+6
फोटो
