)
मुंबई, 1 नोव्हेंबर : मुख्यमंत्री एकनाथ शिंदे यांनी मुंबईतील रस्ते काँक्रिटिकरणाची घोषणा केली होती, पण एकनाथ शिंदें यांच्या स्वप्नाला मोठा धक्का लागला आहे. रस्ते काँक्रिटिकरणाच्या निविदांना मिळालेल्या अत्यल्प प्रतिसादामुळे 5 हजार 800 कोटी खर्चाच्या रस्ते काँक्रिटिकरणाच्या निविदा प्रक्रिया रद्द करण्यात आल्या आहेत. अत्याधुनिक तंत्रज्ञानाच्या बाबी समावेश करुन आणि गुणवत्तेशी तडजोड न करता जलद गतीने कामे होण्यासाठी नव्याने निविदा मागवणार, असल्याचं मुंबई महापालिकेने स्पष्ट केलं आहे. मुंबई महानगरातील सुमारे 400 किलोमीटर लांबीच्या रस्त्यांचे काँक्रिटीकरण करण्यासाठी महानगरपालिका प्रशासनाने ऑगस्ट 2022 मध्ये निविदा प्रक्रिया सुरु केली होती. या पाच निविदांना अत्यल्प प्रतिसाद मिळाला असल्याने या निविदा रद्द करण्याचा निर्णय महानगरपालिका प्रशासनाने घेतला आहे. या कामांसाठी नव्याने लवकरच निमंत्रित केल्या जातील, त्यापूर्वी निविदांच्या अटी व शर्तींचे पुनर्विलोकन करण्यात येईल, तसंच गुणवत्तेशी कोणतीही तडजोड न करता जलदगतीने कामे करणे, अत्याधुनिक तंत्रज्ञानाचा समावेश करणे या दृष्टीने निर्णय घेवून नवीन निविदा मागवण्यात येतील, असं महापालिकेने सांगितलं आहे. मुंबई महानगरपालिकेने 400 किलोमीटर लांबीच्या रस्त्यांचे सिमेंट काँक्रिटीकरण करण्यासाठी एकूण पाच निविदा 2 ऑगस्ट 2022 रोजी निमंत्रित केल्या होत्या. यामध्ये शहर -१, पूर्व उपनगरे -१ आणि पश्चिम उपनगरे - ३ अशा एकूण पाच निविदांचा समावेश होता. या पाच निविदांमध्ये समाविष्ट असलेल्या कामांसाठी एकूण अंदाजित खर्च 5 हजार 806 कोटी रुपये इतका होता. काय होत्या अटी? 1) संयुक्‍त भागीदारीला परवानगी नाही. 2) सदर कामे दुस-या कंत्राटदाराकडे हस्‍तांतरित करण्‍यास परवानगी नाही. 3) पात्रतेचे कडक निकष. 4) राष्‍ट्रीय तसेच राज्य महामार्गांचा अनुभव असावा. 5) बळकट निविदा क्षमता. 6) काम पूर्ण झाल्‍यावर ८०% रकमेचे अधिदान करण्यात येईल व उर्वरित २०% रक्‍कम दोषदायित्‍व कालावधीत अधिदान करण्यात येईल. 7) कामाचा दोषदायित्‍व कालावधी 10 वर्षे ठेवण्‍यात आला आहे. 8) अत्याधुनिक क्‍यूआरकोडचे छायाचित्र बॅरिकेडवर लावण्‍यात येईल, जेणेकरुन सामान्‍य जनतेला कामासंबंधी माहिती मोबाईलवर उपलब्‍ध होईल. 9) बॅरिकेडवर जीपीएस ट्रॅकर बसवणे. 10) गुणवत्‍तेत दोष आढळल्‍यास जबर दंडाची कारवाई करण्यात येईल. 11) कंत्राटदाराची स्‍वतःची यंत्रसामग्री असणे आवश्‍यक आहे. 12) कंत्राटदाराकडील कामगार कमीत कमी १ वर्षे कंपनीच्‍या पे-रोलवर असणे आवश्‍यक आहे. 13) सदरच्‍या कामासाठीचे साहित्‍यसामग्री, कंत्राटदाराच्‍या कंपनीने अधिदान करणे. 14) देखरेखीसाठी सीसीटीव्‍ही कॅमेरे प्रत्‍येक साईटवर बसविणे. 15) प्रत्‍येक रस्‍त्‍यावर वारंवार चर खोदू नये, यासाठी डक्‍ट बांधणे.
मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
+6
फोटो
