कोरोनावरुन WHO चा पुन्हा इशारा! म्हणाले, 'या' गोष्टीमुळे वाढतायेत केसेस

नवी दिल्ली, 20 मार्च : कोरोना विषाणू संसर्ग आल्यापासून आता जवळपास तीन वर्षे झाली आहेत, पण तरीही त्याचा कहर सुरूच आहे. गेल्या काही दिवसांपासून जगभरातील अनेक भागात कोरोना व्हायरसची प्रकरणे झपाट्याने वाढत आहेत. चीन, हाँगकाँग, न्यूझीलंड, ऑस्ट्रेलिया, युरोपियन देशांमध्ये कोरोनाचा संसर्ग नव्याने पसरू लागला आहे. जगभरातील देशांमध्ये वाढत्या चिंतेदरम्यान जागतिक आरोग्य संघटनेच्या (WHO) मुख्य तांत्रिक अधिकारी मारिया व्हॅन केरखोव्ह (Maria Van Kerkhove) यांनी म्हटले आहे की, चुकीची माहिती पसरवण्यासोबत अनेक कारणे आहेत, ज्यामुळे ओमिक्रॉनचा संसर्ग वेगाने वाढत आहे. मारिया म्हणाल्या, ‘कोरोना महामारीबाबत जगभरात अनेक प्रकारचे गैरसमज पसरवले जात आहेत. हा गैरसमज लोकांमध्ये पसरवला जात आहे की महामारी संपली आहे, ओमिक्रॉन अतिशय सौम्य आहे आणि ओमिक्रॉन हे कोविड-19 चा शेवटचा प्रकार आहे. अशा गैरसमजांमुळे कोरोनाचा वेग पुन्हा वाढू लागला आहे.’ WHO तांत्रिक अधिकारी मारिया म्हणाल्या, आपल्या आजूबाजूला अनेक प्रकारची चुकीची माहिती फिरत आहे. जसे की महामारी संपली, ओमिक्रॉन हा शेवटचा प्रकार आहे, इ. अशा चुकीच्या माहितीमुळे लोकांमध्ये संभ्रम निर्माण होत आहे. अमेरिकेत लहान जीवांपासून पसरतोय प्राणघातक व्हायरस! 6 राज्ये विळख्यात ‘कोरोनाविरुद्ध लस अजूनही प्रभावी’ लसीच्या उपयुक्ततेवर बोलताना त्या म्हणाल्या की लस अजूनही सर्वात प्रभावी आहे. हे गंभीर आजार टाळते आणि मृत्यूचा धोका कमी करते. लस सर्वत्र कार्य करते, तो ओमिक्रॉन असला तरीही. आकडेवारीबद्दल बोलायचे झाले तर गेल्या आठवड्याच्या तुलनेत या आठवड्यात जागतिक स्तरावर कोरोनाच्या प्रकरणांमध्ये 8 टक्क्यांनी वाढ झाली आहे. या आठवड्यात संसर्गाची सुमारे 1.1 कोटी नवीन प्रकरणे नोंदवली गेली आहेत. बहुतेक पश्चिम पॅसिफिक प्रदेशात कोरोनाची प्रकरणे वाढली आहेत. BA.2. सर्वात वेगाने पसरणारा प्रकार मारिया म्हणाल्या, ‘BA.2 हा सर्वात वेगाने पसरणारा प्रकार म्हणून उदयास आला आहे. त्या म्हणाल्या की BA.1 च्या तुलनेत BA.2 च्या तीव्रतेमध्ये अद्याप कोणताही बदल झालेला नाही. मात्र, संसर्गाच्या प्रकरणांमध्ये झपाट्याने वाढ होत असल्याने रुग्णालयात दाखल होणाऱ्यांची संख्या वाढत आहे आणि त्यामुळे मृत्यूही वाढत आहेत. अलीकडेच, WHO ने ताज्या साप्ताहिक आकडेवारीचा हवाला देत म्हटले आहे की, कोविड-19 महामारीचा शेवट अजून खूप दूर आहे.

• Follow us on