NEET, JEE विद्यार्थ्यांसाठीही धावला सोनू सूद; म्हणाला, "परीक्षा पुढे ढकलल्या नाही तर..."

मुंबई, 28 ऑगस्ट :  NEET आणि JEE परीक्षेबाबत महाराष्ट्रासह सहा राज्यांनी सर्वोच्च न्यायालयात पुनर्विचार याचिका दाखल केली आहे. देशातील कोरोना महासाथ पाहता ही परीक्षा पुढे ढकलण्याची मागणी होते आहे. अभिनेता सोनू सूदनेदेखील (sonu sood) केंद्र सरकारला या परीक्षा पुढे ढकलण्याची विनंती केली आहे. सोनू सूद विद्यार्थ्यांच्या पाठिशी खंबीरपणे उभा आहे.

सोनू सूदने जीईई आणि नीट परीक्षा पुढे ढकलण्याची विनंती तर केलीच आहे आणि परीक्षा झाल्याच तर सोनू सूद या विद्यार्थ्यांना त्यांच्या परीक्षा केंद्रापर्यंत पोहोचवण्यास मदत करणार आहे. सोनू सूदने याबाबत ट्वीट केलं आहे.

सोनू म्हणाला, "जर जीईई, नीट परीक्षा पुढे ढकल्याच नाहीत. तर जे विद्यार्थी या परीक्षा देणार आहेत त्यांच्यासह मी उभा आहे. तुम्ही प्रवासात कुठेही अडकलात तरी तुमच्या ठिकाणाची माहिती मला द्या. मी तुम्हाला परीक्षा केंद्रापर्यंत पोहोचवण्यात मदत करेन. संसाधनांअभावी कुणाचीही परीक्षा चुकू नये"

“ I N C A S E “ #JEE_NEET doesn’t get

postponed. pic.twitter.com/D2iYzt4wf4

— sonu sood (@SonuSood) August 28, 2020

देशातील कोरोनाची परिस्थिती पाहता अनेक परीक्षा रद्द करण्यात आल्या आहेत. त्यामुळे नीट (NEET) आणि जेईई  (JEE) परीक्षाही रद्द कराव्यात अशी मागणी पालक आणि विद्यार्थ्यांनी केली होती. मात्र सर्वोच्च न्यायालयाने ही मागणी फेटाळून लावली. त्यानंतर राष्ट्रीय परीक्षा एजन्सीनं परीपत्रक जारी केलं आणि परीक्षेच्या तारखा जाहीर केल्या. सप्टेंबरमध्ये या परीक्षा होणार आहेत. जेईईची मुख्य परीक्षा ठरलेल्या तारखेप्रमाणे 1 ते 6 सप्टेंबरदरम्यान होणार आहे. तर नीट परीक्षा 13 सप्टेंबरला होणार आहे.

हे वाचा - NEET, JEE साठी विद्यार्थ्यांचा जीव धोक्यात घालू नका; सोनू सूदची केंद्राला विनंती

मात्र परीक्षेसाठी विद्यार्थ्यांचा जीव धोक्यात टाकू नका, परीक्षा पुढे ढकला. अशी विनंती अभिनेता सोनू सूदने केंद्र सरकारकडे याआधी केली आहे. देशातील सध्याची परिस्थिती पाहता नीट आणि जीईई त्या परीक्षा पुढे ढकलाव्यात अशी माझी केंद्र सरकारकडे विनंती आहे. सध्याच्या कोरोनाच्या परिस्थितीत आपण खूप काळजी घ्यायला हवी, विद्यार्थ्यांचा जीव धोक्यात घालू नये", असं ट्वीट त्याने केलं होतं.

हे वाचा - कडक! लाखो रुपयांची नोकरी सोडली, नक्षलग्रस्त भागात मुलांना शिकवतंय हे दाम्पत्य

दरम्यान या परीक्षेबाबत प्रत्येक राज्यांचं मत वेगवेगळं आहे. काही राज्यांनी परीक्षा घेण्याची भूमिका घेतली आहे तर काही राज्यांनी परीक्षा पुढे ढकलण्याची मागणी केली आहे. आता महाराष्ट्र, राजस्थान, प.बंगाल,  छत्तीसगड, झारखंड, पंजाबचाही या राज्यांनी सर्वोच्च न्यायालयाच्या निर्णयाला आव्हान दिलं आहे. या राज्यांनी पुनर्विचार याचिका दाखल केली आहे.