माझ्या नाटकाचे प्रेक्षक वडिलांच्या टॅक्सीतून आले होते तेव्हा...' भरत जाधवने शेअर केली इमोशनल FB पोस्ट

मुंबई, 21 जानेवारी : अभिनेता भरत जाधव (Bharat Jadhav) याला मराठीतला सुपरस्टार म्हणून ओळखलं जातं. चित्रपटाचा पडदा आणि नाटकाचा रंगमंच दोन्ही ठिकाणी तो त्याच ताज्या दमानं आणि ताकदीचं काम करतो. साहजिकच चाहत्यांचं (fans) प्रचंड प्रेम त्याच्या वाट्याला येत असतं. नुकताच त्यानं फेसबुकवर (Facebook) एक नाट्यमय अनुभव शेअर केला आहे.

भरतचे वडील टॅक्सीचालक (Taxi-driver) होते. सामान्य कुटुंबातून येत त्यानं हे झळाळतं यश मिळवलं आहे. त्यानं या फेसबुक पोस्टमध्ये त्या काळातला एक काळजाचा ठाव घेणारा अनुभव लिहिला आहे, 'एकदा आमच्या वडिलांच्या (father) टॅक्सीमध्ये काही प्रवासी बसले होते. त्यां लोकांना नाटकाच्या प्रयोगाला जाण्यासाठी उशीर होत होता. हे सगळे वडिलांशी हुज्जत घालू लागले. त्यांनी वडिलांना अक्षरश: आई-बहिणीवरून शिव्या दिल्या. मात्र वडील अवाक्षरही बोलले नाहीत. घरी आल्यावर हा अनुभव त्यांनी आम्हाला सांगितला.' हे सगळे लोक भरतच्याच ऑल द बेस्ट या नाटकाचा प्रयोग (drama show) पाहायला चालले होते!

भरत पुढे पोस्टमध्ये (post) सांगतो, की हे सगळे प्रवासी त्याच्याच नाटकाचा प्रयोग पाहण्यासाठी चाललेले होते. मुलाच्या नाटकासाठी लोक अशी इतकी गर्दी करत आहेत या गोष्टीसाठी त्याच्या वडिलांनी तो अपमान मूकपणे सहन केला हे भरतनं अतिशय भावनिक होत या पोस्टमध्ये लिहिलं आहे. भरत सांगतो, की मी त्या दिवशी खूप रडलो. तेव्हा मला 100 रुपये नाईट (night) मिळायची. मी त्यांना त्यादिवशी म्हणालो की आता गाडी चालवणं बंद करा. त्यांनी टॅक्सी चालवणं बंद केलं मात्र ती विकली नाही. त्यांना चिंता होती, की उद्या मुलाचं नाटक चाललं नाही तर काय...'

भरतनं पुढं लिहीलं आहे, की मी पहिली लग्झरी कार (luxury car) ऑटोमॅटिक होंडा अकॉर्ड घेतली तेव्हा पहिल्यांदा त्यानं वडिलांना स्टिअरिंग व्हील हाती दिलं. भरतसह वडिलांचेही डोळे पाणावणारा तो क्षण होता. त्यानंतर भरतनं अनेक बीएमडब्ल्यूसारख्या (BMW) लग्झरी गाड्या घेतल्या.

'मला आनंद या गोष्टीचा आहे, की त्यांच्या हयातीतच मी मला शक्य असलेलं सुख त्यांना देऊ शकलो. त्यांच्या आशिर्वादातूनच मी हा प्रवास केला आहे. आज माझ्या व्हॅनिटी व्हॅनमध्येही (Vanity van) त्याच टॅक्सीचा फोटो लावलेला आहे.' असं भरत शेवट करण्याआधी लिहितो.

'अण्णा... आज मी तुम्हाला खूप मिस करतो आहे. तुमच्यासारखा देवमाणूस मी आयुष्यात पाहिला नाही.' असा शेवट करून भरतनं ही पोस्ट अजूनच उंचीवर नेली आहे. दोन तासांपूर्वी लिहलेल्या या पोस्टला तीन हजारांहून अधिक लाइक्स मिळाल्या आहेत. अनेकांनी भरतचं तोंड भरून कौतुक केलं आहे.