)
मुंबई, 9 जुलै- मराठी अभिनेते किरण माने सोशल मीडियावर प्रचंड सक्रिय असतात. किरण माने सोशल मीडियावर विविध विषयावर मत मांडताना दिसतात. बिग बॉस मराठीच्या घऱानं त्यांना एक वेगळी ओळख मिळाली. या घरात त्यांना ‘सातारचा बच्चन’ अशी स्वत:ची वेगळी ओळख निर्माण केली होती. किरण माने यांचे सातार प्रेम सर्वांना माहित आहे. सातारा त्यांच्या जिव्हाळ्याचा विषय आहे, साताऱ्याबद्दल बोलताना ते कधीच थकत नाहीत. अनेकदा बिग बॉसच्या घरात किरण माने साताऱ्याच्या आठवणीत रमायचे. आता किरण माने यांनी नुकतीच सातारा शहाराविषयी एक पोस्ट लिहिली आहे. सध्या किरण माने यांची ही पोस्ट चांगलीच चर्चेत आली आहे. किरण माने यांनी या पोस्टमध्ये म्हटलं आहे की, …लोकं म्हन्त्यात “सारखं शुटिंगसाठी मुंबई-सातारा-मुंबई.. कशाला यवढी दगदग करत असता? मुंबईत शिफ्ट व्हा की फॅमिली घेऊन.” खरंतर मुंबै लै आवडती. नाटका-सिनेमात रमनारी ! जगातलं हे एकमेव शहर असं आसंल, जिथं रोज, कुठं ना कुठं कुठल्या ना कुठल्यातरी नाटकाचा प्रयोग अस्तो. कुठं ना कुठं, कस्लं ना कस्लंतरी शुटिंग सुरू आस्तं. कस्लं भारीय हे ! वाचा- ‘देशाचे नेते अशिक्षित…’ त्या वक्तव्यामुळे ट्रोल होताच काजोलने दिलं स्पष्टीकरण पन सातारा म्हंजी काळजाचा तुकडा हाय आपल्या. गेली दहा वर्ष मी नाटक-सिनेमा सिरीयलनिमित्तानं हळूहळू मुंबैत बिझी होत गेलो. पन शुटिंग-नाटकाचं प्रयोग करून परत सातारला येताना लिंबखिंडीतनं सातार्‍याकडं बघितल्यावर जे वाटतं मला, ते शब्दांत नाय सांगू शकत.. …माझ्या घराशेजारी भक्कम पाय रोवून माझ्या पाठीशी उभा असलेला अजिंक्यतारा.. म्हैन्यातनं एकदातरी हाक मारून बोलवून घेनारं कास पठार.. आस्तीक असो नायतर नास्तिक, अस्सल सातारकर एकातरी श्रावनी सोमवारी यवतेश्वरला आनि दिवाळीत पयल्या अंघोळीला खिंडीतल्या गनपतीला जातोच.. कधीमधी सज्जनगडावर जाऊन तिथल्या महाप्रसादाची चव चाखतोच ! पावसाळ्यातल्या ठोसेघरपुढं स्कॉटलंड आन युरोप झक मारंल राजेहो !! कधी मन उदास झालं तर माहूलीला कृष्ना-वेन्नेच्या संगमावर जाऊन वहात्या पान्याकडं एकटक बघत बसायचं. मूड फ्रेश असला तर कन्हेर डॅमवर चक्कर मारायची… काय-काय सांगू !
कधी वरच्या रोडवरनं राजवाड्यावर जाऊन खालच्या रोडवर्न परत पोवई नाक्यावर आलं तर आख्खं सातारा भेटतं… दोस्तलोकं हाक मारत्यात “ऐ किरन्या भावा…लै मोट्टा ॲक्टर झालास.. आमाला इसारला न्हायस ना? ये की घरी रैवारी मटन खायाला.” बास. आजून काय पायजे? मुंबै बापासारखी असली तरी सातारा आईसारखी माया करतं माझ्यावर… आपल्या आईला सोडुन कधी कुनी जातं का? म्हनूनच, मुंबैत काम करायला शंभर हत्तींचं बळ देनारा माझा सातारा आपन कधीच सोडनार नाय गड्या…
किरण माने यांच्या या पोस्टवर अनेकांनी कमेंट केल्या आहेत. त्यांच्या पोस्टचं कौतुक केलं आहे. किरण माने यांच्या कामाबद्दल सांगायचे तर ते लवकरच सिंधुताई माझी माई - गोष्ट चिंधीची या मालिकेतुन भेटीला येणार आहेत.
+6
फोटो
