'आई कुठे काय करते' फेम अरुंधतीने खऱ्या लेकीसाठी लिहिली खास पोस्ट, घरातील स्टाफचे मानले आभार

मुंबई, 18 जानेवारी-   ‘आई कुठे काय करते’  (Aai Kuthe Kay Karate)   ही मालिका अतिशय लोकप्रिय झाली आहे. मालिकेतील प्रत्येक व्यक्तिरेखा प्रेक्षकांच्या पसंतीस उतरली आहे. विशेष करून मुख्य व्यक्तिरेखा अरुंधती   (Arundhati). ही भूमिका अभिनेत्री मधुरानी प्रभुलकरने   (Madhurani Prabhulkar)  साकारली आहे. मालिकेत आई असणारी ही अभिनेत्री खऱ्या आयुष्यातसुद्धा एका गोड लेकीची आई आहे. मधुरानीने आपल्या मुलीच्या भोवती फिरणारी एक खास पोस्ट सोशल मीडियावर शेअर केली आहे. पाहूया काय आहे ही पोस्ट. ‘आई कुठे काय करते’ ही मालिका अल्पावधीतच प्रचंड लोकप्रिय झाली आहे. ही मालिका एका आईच्या भावविश्वावर आधारित आहे. प्रत्येक आईला स्वतःची सोडून इतर सर्वांची काळजी असते. घरातील प्रत्येक सदस्यासाठी रात्रंदिवस झटत राहणे, कोणत्याही अपेक्षेशिवाय त्यांच्या प्रत्येक गरजा पूर्ण करणे, हा प्रत्येक आईचा जणू स्वभाव गुणच असतो. परंतु इतकं असूनसुद्धा बऱ्याचवेळा घरातील सदस्यांना तिच्या अस्तित्वाची किंवा तिच्या कष्टाची जाणीव नसते. या विषयाच्या अवतीभोवती फिरणारी ही मालिका आहे. या मालिकेत अभिनेत्री मधुरानी प्रभुलकरने आईची अर्थातच अरुंधतीची भूमिका अतिशय चोखपणे पार पाडली आहे. रील लाईफमधील ही आई रियल लाईफमध्येसुद्धा तितकीच भावनिक आणि मायाळू आहे. आपल्या इन्स्टाग्राम अकाऊंटवर नुकतंच एक पोस्ट शेअर केली आहे. ही पोस्ट तिची मुलगी स्वरालीसोबतच त्या सर्व व्यक्तींसाठी आहे जी अभिनेत्रींच्या उपस्थितीत तिच्या लाडक्या लेकीची काळजी घेतात. तिला तळहाताच्या फोडाप्रमाणे जपतात.

काय आहे पोस्ट- मधुरानी प्रभुलकरने पोस्ट करत लिहिलं आहे, ‘अरुंधती म्हणून आपण सर्व मला रोज आई कुठे काय करते ह्या दैनंदिन मालिकेत पाहता… पण मधुराणी म्हणून माझ्या व्यक्तिगत आयुष्यातही एक स्वतंत्र डेली सोप चालूच असतो . जसे अरुंधती च्या आयुष्यात चढ उतार येतात तसे माझ्याही आयुष्यात चालू असतात.गेले २ वर्ष मी ही मालिका करतेय. शूट मुंबईत असतं आणि माझी मुलगी आणि नवरा पुण्यात…! स्वरालीला मी खूपखूप दिवस भेटत नाही , तिच्या आयुष्यातल्या काही छोट्या पण निरागस आनंदात मी नसते. कधी तिच्या छोट्या मोठ्या आजारपणात मी नसते… कधीकधी मी २० /२० दिवस तिला भेटू शकत नाही. काम करताना हे सल आणि मुलीची ओढ आणि आठवण सतत माझ्याबरोबर असते … (हे वाचा: ‘आई कुठे काय करते’ फेम अरुंधतीच्या रिअल लाईफ लेकीला पाहिलंत का? आहे … ) ‘पण तिची काळजी अशी नसते कारण प्रमोद त्याचे व्याप सांभाळून अतिशय मायेने सगळं करतो पण ह्यात अतिशय मोलाचा वाटा आहे तो आमच्या support स्टाफ चा.स्वराली ला शाळेसाठी तयार करणे, नेऊन सोडणे ( तिची शाळा व्यवस्थित ऑफ line सुरू आहे … त्याबद्दल नंतर लिहीन ) , तिच्या आवडीचं खायला करणे, खायला घालणे , तिच्याशी खेळणे, तिची नाटकं सहन करणे , तिच्या इतर activities साठी पाठवणे.… ही सगळी आणि त्याहीपेक्षा कितीतरी जास्त काम ही सगळी मंडळी अतिशय प्रेमाने आणि निष्ठेने करतात म्हणून मी निर्धास्तपणे काम करू शकते.आपण भरतकामाची नक्षी पाहतो आणि त्याचं कौतुक करतो पण मागच्या बाजूला वेगळी वीण असते, अनेक टाके आणि गाठीही असतात त्या आधारावर ते नक्षीकाम उभं असतं.प्रमोद आहे , माझी आईही असते त्याच बरोबर हा इतका प्रेमळ आणि खंबीर स्टाफ आहे म्हणून अरुंधती आहे. विजय, अमोल , अनिता , ज्योती , अनुराधा , आशा ,ऋतुजा, अमृता …. तुम्हाला भरभरून प्रेम’अशी पोस्ट करत मधुरानीने सर्वांचे आभार मानले आहेत.

• Follow us on