पती आणि सासूची हत्या; खोल दरीत मृतदेहाचे तुकडे अन्..7 महिन्यांनी खुलासा, त्या हत्याकांडाची संपूर्ण कहाणी

गुवाहाटी 23 फेब्रुवारी : एखाद्या व्यक्तीचा खून करून पुरावा नष्ट करण्यासाठी मृतदेहाचे तुकडे करण्याचे धक्कादायक प्रकार गेल्या काही दिवसांत समोर आलेत. पण आसाम राज्यात माणुसकीला काळिमा फासणारं कृत्य घडलंय. येथील गुवाहाटी येथे प्रियकर व मित्राच्या मदतीनं एका महिलेनं पती व सासूची हत्या केली, व त्यानंतर या दोघांच्या शरीराचे बारीक तुकडे करून ते मेघालय राज्यात फेकून दिले. या घटनेचा उलगडा करण्यास पोलिसांना तब्बल सात महिन्यानंतर यश आलं. ‘आज तक’ने याबाबत वृत्त दिलंय. श्रद्धा वालकर खून प्रकरण असो की अंजन दास हत्या प्रकरण, या दोन्ही प्रकरणानंतर देशाची राजधानी दिल्ली हादरली होती. तर, झारखंडमधील रेबिकाच्या हत्येचं प्रकरणही खूपच धक्कादायक होतं. या तिन्ही प्रकरणात फसवणूक, खून आणि मृतदेहाचे तुकडे फ्रीजमध्ये ठेवणे, अशा विविध गोष्टींमध्ये साम्य होतं. पण आता आसाम राज्यातील असा दुहेरी हत्याकांडाचा प्रकार समोर आलाय, ज्यानं पोलिसांनाही धक्का बसलाय. आसाममधील अमरज्योती डे (वय 32) आणि शंकरी डे ( वय 62) या दोघांची निर्घृण हत्या करण्यात आली. त्यानंतर दोघांच्या शरीराचे बारीक तुकडे करून ते दरीमध्ये फेकून देण्यात आले. निर्दयतेची परिसीमा ओलांडणार हे प्रकरण असून ते नेमकं काय आहे, ते जाणून घेऊया. अचानक बेपत्ता झालेला तरूण; आई-वडील शोधून थकले, 50 वर्षांनंतर एका कॉलने उलगडलं मोठं रहस्य 29 ऑगस्ट 2022 चा तो दिवस आसाममधील गुवाहाटीमध्ये वंदना कलिता नावाची महिला 29 ऑगस्ट 2022 रोजी पोलीस स्टेशनला आली होती. तिनं पोलिसांना सांगितलं की, ‘माझा पती अमरज्योती डे आणि सासू शंकरी डे हे अचानक गायब झालेत. त्या दोघांचा खूप शोध घेतला, पण ते सापडले नाहीत.’ वंदनाच्या तक्रारीची नोंद घेत पोलिसांनी या प्रकरणी तपास सुरू केला. पण पोलिसांच्या तपासादरम्यान कोणताही ठोस माहिती हाती लागली नाही. या घटनेचं गूढ उकलण्यासाठी पोलीस बरीच धावपळ करत होते, मात्र कोणताही ठोस पुरावा हाती लागत नव्हता. त्यामुळे अमरज्योती डे आणि त्यांची आई शंकरी डे कुठे गायब झाले, याचा शोध पोलिसांना लागेना. मात्र, नोव्हेंबर 2022 मध्ये अमरज्योती यांचा चुलत भाऊ पोलीस ठाण्यात आला, व त्यांनी या दोघांच्या गायब होण्याबाबत नवीन तक्रार दिली. यामध्ये त्यांनी हे दोघं बेपत्ता होण्यामागे वंदना कलिता असल्याचा संशय व्यक्त केला होता. ही तक्रार प्राप्त झाल्यानंतर पोलिसांच्या तपासाची दिशाच बदलली, व तपासात अनेक धक्कादायक खुलासे झाले. अमरज्योती यांच्या चुलत भावानं त्यांच्या तक्रारीमध्ये वंदनावर संशय व्यक्त करण्याचं कारण दिलं होतं की, वंदनानं तिच्या सासूच्या म्हणजेच शंकरी डे यांच्या अकाउंटमधून पैसे काढले होते. हाच धागा पकडून पोलिसांनी तपासाला सुरूवात केली. गर्लफ्रेंडला भेटायला गेला विवाहित प्रियकर, मुलीच्या घरच्यांनी थेट विषयच संपवला! दोन तक्रारी दाखल होताच पोलीस तपासाला वेग एकाच प्रकरणाच्या दोन तक्रारी प्राप्त झाल्यामुळे पोलिसांच्या तपासाला वेग आला. अमरज्योती डे यांची पत्नी वंदना आणि चुलत भावानं नूनमती या एकाच पोलीस ठाण्यात वेगवेगळ्या तक्रार दिल्या होत्या. त्यामुळे तेथील पोलिसांनी या प्रकरणाचा तपास सुरू केला. तपासामध्ये अमरज्योती डे आणि त्यांची आई शंकरी डे यांचा अज्ञात व्यक्तीनं खून केल्याचं समोर आलं. तपासात पोलिसांना पहिली हत्या शंकरी डे यांची, तर दुसरी हत्या अमरज्योती डे यांची झाली होती, व या दोन्ही खुनाच्या घटना गुवाहाटीतील चांदमारी आणि नारेंगी भागात वेगवेगळ्या ठिकाणी घडल्या होत्या अशी माहिती मिळाली. तो धागा पकडला अन् पोलीस उपायुक्त (मध्य) दिगंत कुमार चौधरी यांनी दिलेल्या माहितीनुसार, ‘पोलिसांनी या प्रकरणाचा तपास करताना मयत अमरज्योती डे यांच्या चुलत भावानं वंदना कलिता हिच्यावर व्यक्त केलेल्या संशयाचा धागा पकडत तपास सुरू केला होता. पोलिसांनी अमरज्योती डे आणि वंदना कलिता यांच्या मोबाइलवर येणाऱ्या व जाणाऱ्या कॉल आणि एसएमएसवर लक्ष ठेवलं, व दोघांच्या मोबाइलचे सीडीआरही मिळवले. यानंतर सीडीआर, मोबाइल लोकेशन आदी तपासताना पोलिसांच्या हाती महत्त्वाचे धागेदोरे लागले. त्यानंतर अखेर घटनेनंतर तब्बल सात महिन्यांनी खुनीचं नाव जेव्हा पोलिसांना कळालं, तेव्हा सर्वांनाच आश्चर्याचा धक्का बसला. पोलीस उपायुक्त चौधरी यांनी सांगितलं की, ‘अमरज्योती डे आणि त्यांची आई शंकरी डे यांचा खून करणारी व्यक्ती दुसरी कोणी नसून अमरज्योती डे यांची पत्नी वंदना कलिता हिच होती. तिने तिचा प्रियकर आणि मित्रासोबत मिळून हे धक्कादायक कृत्य केलं होतं.’ पोलिसांनी दिलेल्या माहितीनुसार, ‘वंदनाला खून करण्यासाठी साथ देणाऱ्या तिच्या प्रियकराव्यक्तीरिक्त तिसरा आरोपी वंदनाचा बालपणीचा मित्र आहे. आरोपींना अटक करण्यात आली असून, त्यांची चौकशी करण्यात येत आहे. चौकशीदरम्यान वंदनानं स्वतःसह दोन जणांसोबत तिचा पती अमरज्योती डे आणि सासू शंकरी डे ची हत्या केल्याची कबुली दिली.’ अशी केली हत्या पोलीस उपायुक्त दिगंत चौधरी यांनी दिलेल्या माहितीनुसार, ‘मयत शंकरी डे आणि त्यांचा मुलगा मयत अमरज्योती डे दोघेही वेगवेगळ्या घरात राहत होते. आरोपी महिला वंदना हिनं 26 जुलै 2022 रोजी गुवाहाटी भागातील चांदमारी येथे प्रथम तिची सासू शंकरी डे यांची हत्या केली, त्यानंतर मृतदेहाचे छोटे तुकडे करून ते फ्रीजमध्ये ठेवले. तर, 17 ऑगस्ट 2022 रोजी गुवाहाटी येथील नारेंगी येथेच वंदनानं तिच्या दोन साथीदारांसह पती अमरज्योती डे यांची हत्या करून मृतदेहाचे छोटे तुकडे केले.’ पती व सासूच्या मृतदेहाची विल्हेवाट लावण्याचं आव्हान वंदनासमोर होतं. पोलिसांना पुरावा हाती लागू नये, यासाठी आरोपींनी मृतदेहाचे केलेले तुकडे हे आसामऐवजी शेजारचं राज्य मेघालयात फेकून देण्याचं ठरवलं. त्यानुसार आरोपींनी मृतदेहाचे तुकडे पॉलिथिन बॅगमध्ये भरले, आणि नंतर ते दोन पिशव्यांमध्ये भरून आरोपी वंदना, तिचा प्रियकर आणि मित्र असे तिघेही मेघालय राज्याच्या सीमेकडे रवाना झाले. मेघालय राज्याच्या हद्दीत प्रवेश केल्यानंतर या तिघांनी मृतदेहाच्या तुकड्यांनी भरलेल्या पिशव्या एका खोल दरीत फेकून दिल्या. आरोपींनी चौकशीत दिलेल्या माहितीवरून पोलिसांनी आता दोन्ही मृतदेहांचे काही तुकडे जप्त केलेत. पोलिसांनी दिलेल्या माहितीनुसार, रविवारी(19 फेब्रुवारी 2023) चेरापुंजीजवळ खासी हिल्समध्ये शंकरी डे यांच्या मृतदेहाचे काही भाग सापडलेत. मात्र उर्वरित सर्व तुकड्यांचा शोध सुरू आहे. दरम्यान, याप्रकरणानं संपूर्ण गुवाहाटी परिसर हादरला असून पोलीस पुढील तपास करीत आहेत.

• Follow us on