मृतदेहाच्या कपड्यांचा वास घेतला अन् 30 सेकंदात पकडला खुनी,'कॅटी'ला मिळणार Employee Of The Month पुरस्कार

वेद प्रकाश, प्रतिनिधी

ऊधम सिंह नगर, 10 मार्च : उत्तराखंडमधील उधम सिंह नगर जिल्ह्यात गव्हाच्या शेतात तरुणाचा मृतदेह आढळल्याने खळबळ उडाली होती. मृतदेहावर प्राण्यांच्या पंजाच्या खुणा होत्या. स्थानिक लोकांच्या माहितीवरून पोलीस श्वान पथकासह घटनास्थळी पोहोचले. यानंतर श्वानपथकातील महिला श्वान कॅटीने अवघ्या 30 सेकंदात खुन्याची ओळख पटवली.

यानंतर चौकशीत आरोपीने पोलिसांसमोर गुन्ह्याची कबुली दिली. त्यामुळे जिल्ह्याचे वरिष्ठ पोलीस अधीक्षक (एसएसपी) डॉ. मंजुनाथ टीसी यांनी हुशार केटीला 'Employee Of The Month' म्हणून नामांकित केले आहे.

पोलिसांकडून मिळालेल्या माहितीनुसार, ही घटना जसपूर कोतवाली परिसरातील बडियोवाला गावातील आहे. तरुणाचा मृतदेह गव्हाच्या शेतात पडलेला आढळून आला. साकिब (21 वर्षे) असे त्याचे नाव असून तो जसपूरचा रहिवासी होता. माहिती मिळताच, कोतवाल प्रकाशसिंग दानू यांच्या नेतृत्वाखाली पोलीस घटनास्थळी पोहोचले. मृतदेहावर जखमेच्या खुणा दिसल्यानंतर पोलिसांनी या प्रकरणाचा तपास सुरू केला.

मृताचे वडील अनिश अहमद यांनी पोलिसांना सांगितले की, बुधवारी संध्याकाळी त्यांचा मुलगा कासिम उर्फ ​​दानिश, निजाम आणि रझा यांच्यासोबत होता. यानंतर पोलिसांनी श्वानपथक आणि फॉरेन्सिक टीमला घटनास्थळी पाचारण केले. पोलिसांनी मृताचे रक्ताने माखलेले कपडे धुंडाळले असता श्वान पथकातील महिला श्वान कॅटीने तिन्ही संशयितांना उभे करून ड्रील केले. त्यानंतर कॅटीने संशयित कासिमवर भुंकायला सुरुवात केली. पोलिसांनी कासिमला ताब्यात घेतल्यानंतर त्याची कसून चौकशी केली असता, त्याने आपल्या गुन्ह्याची कबुली दिली.

बेल्टने गळा दाबून केली हत्या -

घटनेची माहिती देताना उधम सिंह नगरचे एसएसपी डॉ. मंजुनाथ टीसी यांनी सांगितले की, सीसीटीव्ही फुटेज तपासल्यानंतर आणि मृताचे वडील अनिश अहमद यांची चौकशी केली. यानंतर असे आढळून आले की, मृत साकिब आणि कासिम हे नशेसाठी सिगारेट विकताना आणि जंगलकडे जाताना दिसले होते. याठिकाणी दोघांमध्ये भांडण झाले आणि साकिबने कासिमच्या कुटुंबीयांना शिवीगाळ करण्यास सुरुवात केली. यानंतर गांजाच्या नशेत कासिमने साकिबचा वार करून आणि बेल्टने त्याचा गळा दाबून खून केला. हत्येनंतर कासिमने चाकूच्या सहाय्याने मृताच्या पोटावर पंजाच्या खुणा केल्या.

परीक्षेचा तणाव आहे का? प्रेशर कमी करण्यासाठी या पालकांचा आगळावेगळा प्रयोग, VIDEO

30 सेकंदमध्ये आरोपीची ओळख पटवली -

या घटनेच्या तपासासाठी आठ पथके तयार करण्यात आली होती. यात जसपूर कोतवाली पोलीस, श्वान पथक आणि फॉरेन्सिक टीमने त्वरित कारवाई केली आणि प्रकरणाचा खुलासा केला. ते म्हणाले की श्वान पथकातील धाडसी महिला श्वान केटीने अवघ्या 30 सेकंदात संशयिताची ओळख पटवली, त्यामुळे ही घटना लवकर उघड झाली. 'एम्प्लॉयी ऑफ द मंथ'साठी शूर कॅटीचे नाव नामांकन करण्यात आल्याचे त्यांनी सांगितले.

कॅटीने यापूर्वी अनेक प्रकरणे सोडवली -

उधमसिंग नगर पोलिसांच्या श्वान पथकातील महिला श्वान कॅटी गेल्या अनेक वर्षांपासून पोलीस विभागाचा एक भाग आहे. आतापर्यंत डझनभर प्रकरणांचे गूढ उकलण्यात तिने महत्त्वाची भूमिका बजावली आहे.