बसची वाट पाहात असलेल्या प्रवाशांना भरधाव कारनं चिरडलं, 7 जणांचा जागीच मृत्यू

टेक्सास : बसची वाट पाहात स्टॉपवर प्रवासी उभे होते. मात्र त्यांना याची जराही कल्पना नव्हती की बसऐवजी आपला मृत्यूच आपल्या समोर येऊन उभा ठाकेल. बसची वाट पाहाच उभ्या असेलेल्या प्रवाशांना भरधाव कारनं चिरडलं आहे. या भीषण दुर्घटनेत 7 जणांचा मृत्यू झाला असून अनेक जण जखमी आहेत. या घटनेचा व्हिडीओ सोशल मीडियावर व्हायरल होत आहे. अपघाताची माहिती मिळताच पोलीस अधिकारी घटनास्थळी दाखल झाले. त्यांनी जखमी व्यक्तींना उपचारासाठी स्थानिक रुग्णालयात दाखल केलं आहे. ब्राउन्सविले पोलीस अधिकारी मार्टिन सँडोव्हल यांनी दिलेल्या माहितीनुसार हा अपघात यूएस वेळेनुसार सकाळी 8.30 च्या सुमारास झाला.

अपघाताबाबत माहिती मिळाल्यानंतर आम्ही सीसीटीव्ही तपासले, ज्यामध्ये एक एसयूव्ही कार लोकांना चिरडत असल्याचं आम्हाला दिसलं. गाडीचा वेळ यावेळी भयंकर होता. त्यामुळे चालकालाही कारवर नियंत्रण मिळवता येत नव्हतं. नेमकी ही दुर्घटना कशामुळे घडली याबाबत सध्या कोणतीही माहिती मिळू शकली नाही.

त्या बस स्टॉपवर बसायला बेंच नव्हता, बसची वाट पाहात लोक उभी होती. बस येण्याच्या वाटेकडे सगळ्यांचे डोळे होते. लवकर चढायला मिळावं म्हणून प्रवाशांनी एकाच ठिकाणी घोळका केला होता. अचाकन आलेल्या SUV कारने या लोकांना चिरडलं. पोलिसांनी कार चालकाला ताब्यात घेतलं असून त्याची चौकशी सुरू आहे.

प्रत्यक्षदर्शीने दिलेल्या माहितीनुसार कार चालकाचा ताबा सुटला, त्यामुळे हा अपघात झाल्याचं दिसलं. साधारण 100 फुटांपर्यंत कारने प्रवाशांना धडक मारुन फरफटत नेलं. यामध्ये ७ जणांचा जागीच मृत्यू झाला आहे.

• First Published : May 8, 2023, 6:46 am IST