2 हजारहून अधिक काडीपेटी, ओडिशाच्या मुलानं तयार केली हॉकी वर्ल्ड कपची प्रतिकृती!

मुंबई, 11 जानेवारी : जागतिक हॉकीमधील सर्वात मोठ्या स्पर्धांपैकी एक असलेल्या पुरुष हॉकी विश्वचषक स्पर्धेला शुक्रवार 13 जानेवारी पासून सुरुवात होणार आहे. ओडिशा राज्यात सलग दुसऱ्यांदा या हॉकी विश्वचषकाचे आयोजन करण्यात आले असून आज या स्पर्धेचा उदघाटन सोहोळा पार पडणार आहे.  क्रीडा रसिकांमध्ये या स्पर्धेविषयी उत्साह पहायला मिळत असून ओडिशामधील एका 19 वर्षीय युवकाने 2 हजारहून अधिक काडीपेटीच्या काड्यांपासून हॉकी वर्ल्ड कप 2023 च्या ट्रॉफीची  प्रतिकृती तयार केली आहे.

रंजन साहूने 2023 च्या ट्रॉफीची ही प्रतिकृती तयार केली

सास्वत रंजन साहू असे या 19 वर्षीय मुलाचे नाव आहे. तो हॉकी खेळाचा मोठा चाहता असून त्याने यापूर्वी देखील काडीपेटीच्या पाड्यांपासून अनेक वस्तू तयार केल्या आहेत. हॉकी वर्ल्ड कप ट्रॉफीची प्रतिकृती तयार करण्यासाठी त्याने तब्बल 2 हजार 726 काड्यांचा वापर केला. साहू याने तयार केलेली ट्रॉफीची प्रतिकृती 44 सेमी उंच आणि 18 सेमी रुंद आहे. वर्ल्ड कपचे हे मॉडेल पूर्ण करण्यासाठी साहूला 13 दिवसांचा अवधी लागला. हे ही वाचा :  हॉकी वर्ल्ड कप शुक्रवारपासून; भारताचे सामने कधी, कुठे पाहता येणार? पुरुष हॉकी विश्वचषक स्पर्धेच्या सर्व सहभागी संघांना माझ्या शुभेच्छा देण्यासाठी मी ही ट्रॉफी बनवली असल्याचे साहूने सांगितले.  ओडिशाचे मुख्यमंत्री आदी मान्यवरांच्या उपस्थितीत साहूने बनवलेले हे मॉडेल त्याने राज्य सरकारला सुपूर्द केले आहे.  हॉकी विश्वचषक स्पर्धेला भारतातील ओडिशा येथे 13 जानेवारी पासून सुरुवात होणार असून यात 16 संघानी सहभाग नोंदवला आहे.  विश्वचषकाचे सामने भुवनेश्वरमधील कलिंगा स्टेडियम आणि राउरकेला येथील बिरसा मुंडा आंतरराष्ट्रीय हॉकी स्टेडियमवर होणार आहेत. या विश्वचषकासाठी क्रीडा प्रेमी उत्साहित असून यंदाचा विश्वचषक कोण पटकावणार याकडे सर्वांचे लक्ष असेल.

• First Published : January 11, 2023, 6:27 pm IST