इंदापूर, 25 डिसेंबर : ख्रिसमस आणि नाताळच्या सुट्ट्यांमुळे सुट्टीवर तसंच देवदर्शनाला राज्यातले नागरिक मोठ्याप्रमाणावर जात आहेत. इंदापूरचे महेंद्र घोगरे हेदेखील त्यांच्या 4 वर्षांच्या मुलासोबत गणपतीपुळ्याला देवदर्शनाला जात होते, पण एका चुकीमुळे या बाप-लेकांना जीव गमवावा लागला आहे. इंदापूर तालुक्यातील भाविक सुट्टीमुळे गणपतीपुळ्याला देवदर्शनासाठी निघाले होते, पण त्यांच्या गाडीला सांगली जिल्ह्यातील कोकरूड येथे अपघात झाला आहे. हा अपघात कराड-रत्नागिरी राज्य महामार्गावरील कोकरूड येथे झाला आहे. या अपघातात इंदापूर तालुक्यातील बावडा गावातील बाप-लेकांना जीव गमवावा लागला आहे.
वारणा नदीवर असलेल्या कोकरूड-नेर्ले पुलावर रस्त्याचा अंदाज न आल्याने पुलाच्या दुभाजकाला कार धडकल्याने हा अपघात झाल्याची माहिती मिळत आहे. या अपघातात महेंद्र अशोक घोगरे या 35 वर्षीय व्यक्तीचा आणि त्यांचा मुलगा महेंद्र घोगरे या 4 वर्षांच्या मुलाचा मृत्यू झाला आहे. हे दोघंही पुणे जिल्ह्याच्या इंदापूर तालुक्यातील बावडा-वकिलवस्तीचे रहिवासी आहेत. या अपघातामध्ये आणखी तिघेजण जखमी झाले आहेत.