मुंबई 27 जून: अभिनेत्री हृता दुर्गुळे (Hruta Durgule) सध्या सातव्या आसमानावर आहे. हृताच्या आयुष्यात एकामागे एक सुखद धक्के बसताना दिसत आहे. आता तिच्या आनंदात भर पडणारी अजून एक कोरीकरकरीत आनंदाची बातमी आपल्यासमोर आली आहे. अखेर तिच्या बहुचर्चित सिनेमा ‘अनन्या’ चा ट्रेलर प्रदर्शित झाला आहे. अत्यंत अप्रतिम पद्धतीने केलेल्या ट्रेलरला बरीच पसंती मिळत आहे. स्वतःच्या जिद्दीवर एखादी मुलगी अपघाताचा सामना कशी करते याच मूर्तिमंत उदाहरण या सिनेमात पाहायला मिळणार आहे. कोणताही अडथळा आला तरी स्वप्नांच्या आकाशात स्वच्छंदी भरारी घेणारी ही अनन्या देशमुख पाहायला आता प्रेक्षक बरेच उत्सुक झाले आहेत. हृता दुर्गुळे हे नाव आता अभिनय क्षेत्रात नवं राहिलेलं नाही. हृता तिच्या अभिनयामध्ये सध्या विविधता आणायचा प्रयत्न करत आहे. महाराष्ट्राची क्रश असणाऱ्या हृता दुर्गुळेचा नवा चित्रपट ‘अनन्या’ (Ananya marathi movie) लवकरच चित्रपटगृहात भेटीला येणार आहे. या चित्रपटाची पहिली झलक काही दिवसांपूर्वी समोर आली होती. आता अनन्या या चित्रपटाचा ट्रेलर (Ananya movie trailer) आज रिलीज झाला आहे ज्याची बरीच चर्चा होताना दिसत आहे. ‘अनन्या’ हा अत्यंत वेगळ्या धाटणीचा विषय असणारा चित्रपट 22 जुलै रोजी चित्रपटगृहात रिलीज होणार आहे. हा ट्रेलर सुद्धा उत्कंठा वाढवून ठेवत आहे. हा ट्रेलर पाहून दुःखात असणाऱ्या अनेकांना उभारी मिळताना दिसत आहे. एका सामान्य मुलीची इन्स्पिरेशनल आणि असामान्य बनण्याची कथा दाखवणारा हा ट्रेलर किंचित डोळे पाणवणारा सुद्धा आहे. अपघातासारख्या प्रसंगातून हात निकामी झाल्यावर सुद्धा स्वतःला बाहेर काढत जगणाऱ्या अनन्याला पाहायला सगळेच आतुर झाले आहेत. आजवर फक्त हृताचा आवाज आणि पुसटशी ओळख देणारा एक टीजर प्रदर्शित झाला होता.