विरारमध्ये भिंत कोसळून तीन ठार
विजय देसाई, प्रतिनिधी मुंबई, 6 जून : विरार पूर्वच्या मनवेल पाडा रोडवरील सूर्य किरण या बिल्डिंगचे रिडेव्हलपमेंटचे काम सुरू असताना भिंत कोसळून चार कामगार ढिगाऱ्याखाली अडकल्याची घटना घडली आहे. या घटनेत तीन महिला कामगारांचा मृत्यू झाला आहे तर एक जण गंभीर जखमी आहे. अचानक घडलेल्या या घटनेनंतर इतर कामगारांना काय करावं काही सुचेना. ही घटना स्थानिकांना समजताच त्यांनी मततीसाठी धाव घेतली. निर्माणाधीन इमारतीची भिंत कोसळली आज दुपारच्या सुमारास हे कामगार काम संपल्याने निघत होते. मात्र, काम संपल्यानंतर साचलेल्या पाण्यातच हात पाय धुण्यासाठी गेले असताना बांधलेली भिंत या कामगारांच्या अंगावर कोसळली. या भिंतीच्या ढिगाऱ्याखाली चार कामगार अडकले होते. इतर नागरिकांच्या हा प्रकार लक्षात आल्यानंतर बचाव कार्य सुरू झाले. अग्निशमन पथकाच्या जवनांमार्फत त्यांनी या कामगारांना बाहेर काढून रुग्णालयात दाखल केले. मात्र, उपचाराआधीच तीन महिला कामगारांचा या दुर्घटनेत मृत्यू झाला होता. या अपघातात जखमी असलेल्या एका मजुरावर खाजगी रुग्णालयात उपचार सुरू आहेत.