मुंबई 17 ऑक्टोबर : अंधेरी पूर्व पोटनिवडणुकीसंदर्भात मोठी बातमी समोर आली आहे. या निवडणुकीत भाजपने माघार घेतली आहे. ठाकरे गटाच्या ऋतुजा लटके आणि भाजपचे मुरजी पटेल यांच्यात मुख्य लढत पाहायला मिळणार होती. मात्र, मुरजी पटेल यांनी उमेदवारी अर्ज माघारी घेतला आहे. त्यामुळे ही निवडणूक बिनविरोध होण्याची शक्यताही आहे. यावर आता मुरजी पटेल यांनी पहिली प्रतिक्रिया दिली आहे. Andheri East Bypoll : अंधेरी पोटनिवडणुकीसंदर्भात सर्वात मोठी बातमी; भाजपची माघार भाजपच्या या निर्णयाबाबत बोलताना भाजपचे नेते मुरजी पटेल म्हणाले, की मी पक्षाचा आदेश मानणारा कार्यकर्ता आहे. मी अजिबातही नाराज नाही. मी पक्षाचा आदेश मान्य करतो. पक्षाने याबाबतचा निर्णय सांगताच एकाही मिनिटाचा विचार न करता अर्ज मागे घेतला आहे, अशी माहिती मुरजी पटेल यांनी दिली.
या निर्णयामुळे तुम्ही नाराज आहात का, असा सवाल केला असता पटेल म्हणाले, की यापुढेही मी पक्षाचा एकनिष्ठ कार्यकर्ता म्हणून काम करत राहील. पक्षाचा आदेश माझ्यासाठी खूप महत्त्वाचा आहे. मी पक्ष जो आदेश देईल तो मानणारा कार्यकर्ता आहे. मात्र, या निवडणुकीचे सर्व्हे बघून घ्या. आम्ही मोठ्या मताधिक्क्याने निवडून येणार होतो, असा दावा त्यांनी केला आहे. पण पक्ष महत्त्वाचा आहे त्यामुळे मी नाराज नाही, असं त्यांनी स्पष्ट केलं आहे. काल मुख्यमंत्र्यांची भेट, आज फडणवीसांना पत्र, नंतर राज ठाकरे म्हणतात, ‘सगळीकडे ओरबाडणं सुरुय’ रमेश लटके यांना श्रद्धांजली म्हणून ही निवडणूक बिनविरोध व्हावी, यासाठी राज ठाकरे यांनी उपमुख्यमंत्री देवेंद्र फडणवीस यांना पत्र लिहिलं होतं. यानंतर भाजप काय निर्णय घेतं याकडेच सर्वांचं लक्ष लागलेलं होतं. अशात आता भाजपने आपला उमेदवार मागे घेत असल्याची घोषणा केली आहे. ही महाराष्ट्राची संस्कृती आहे. त्यामुळे आम्ही ही निवडणूक लढवत नसल्याचं भाजपने सांगितलं आहे. भाजपचे प्रदेशाध्यक्ष चंद्रशेखर बावनकुळेंनी याबाबत माहिती दिली. भाजपने अंधेरी पोटनिवडणुकीत उमेदवारी अर्ज माघारी घेतल्याने आता ही पोटनिवडणूक बिनविरोध होणार का? हे पाहणं महत्त्वाचं ठरणार आहे. आणखी १३ उमेदवार रिंगणात आहेत. मात्र ऋतुजा लटके यांच्यासमोर मोठं आव्हान असलेले भाजपचे उमेदवार मुरजी हे या निवडणुकीतून बाहेर पडले आहेत.