मुंबई, 21 ऑक्टोबर : मनसे अध्यक्ष राज ठाकरेंनी आयोजित केलेल्या दिपोत्सवाला आज मुख्यमंत्री एकनाथ शिंदे, उपमुख्यमंत्री देवेंद्र फडणवीस यांनी हजरी लावली. हा दिपोत्सव आपल्या सर्वांचं जीवन प्रकाशमय करो, ज्याप्रमाणे आपण याठिकाणी रोषणाई केली, तशीच सर्वांच्या मनामध्ये अगदी ही रोषणाई उजळून निघू द्या, सर्वांना सुखाचे समृद्धीचे दिवस येवो, यासाठी हे सरकार प्रयत्नशील राहील, असे प्रतिपादन मुख्यमंत्री एकनाथ शिंदे यांनी यावेळी केले. तसेच यावेळी त्यांनी उद्धव ठाकरेंचे नाव न घेता त्यांना टोला लगावला. काय म्हणाले मुख्यमंत्री एकनाथ शिंदे - सर्वांनाच दिवाळीच्या खूप साऱ्या शुभेच्छा. या शिवतीर्थावर राज ठाकरेंच्या संकल्पनेतून दिपोत्सव मागील 10 वर्षांपासून आयोजित केला जातो. या कार्यक्रमाला उपस्थित उपमुख्यमंत्री देवेंद्र फडणवीस आणि इतर सर्व मान्यवर सर्वांनाच दिवाळीच्या शुभेच्छा देताना आनंद होतोय. मागील 2 वर्ष कोरोनामुळे आपल्याला अनेक सण इच्छा असूनही मर्यादेमुळे साजरा करता आले नाही. सर्वांना सोबत घेऊन राज ठाकरे आणि त्यांचे सहकारी करताय, मी त्यांचं अभिनंदन करतो. आपण दिवाळीमध्ये अनेक ठिकाणी सर्वजण आपापल्या परीने दिवाळीचा उत्सव साजरा करत असतो. यावर्षी आम्ही सर्व उत्सव जोरात करायचे ठरवले. तसेच ती कमिटमेंट आम्ही पूर्ण करतोय. गणपतीमध्ये, नवरात्रीमध्ये लोकांनी खूप आनंद घेतला. सर्वजण दबून बसले होते. मात्र, आता थोडा मोकळा श्वास घेतला असं म्हटलं तर चुकीचं ठरणार नाही.
दिवाळीची चांगली सुरुवात आहे. आनंद घेऊया. आम्ही ठरवलंय की, हे सर्वसामान्यांचं सरकार आहे. कष्टकऱ्यांचे, कामगारांचे आणि प्रत्येक माणसाचं हे सरकार आहे. आम्ही नेहमी आपल्याला सांगितलंय की, कधीही आपण हक्काने आम्हाला सांगा, काहीही सूचना असतील शेवटी तुमचं काही वैयक्तिक काम नसते. तुम्हाला अनेक लोक भेटत असतात, तुम्हाला विनंती करु शकतात आणि सरकारच्या माध्यमातून आपण ते सोडवू शकतो, असे मुख्यमंत्री एकनाथ शिंदे राज ठाकरेंना म्हणाले.
तुम्ही कधीही आम्हाला सांगता ते लोकांच्या, हिताचे विषय सांगता. शेतकऱ्यांसाठी देखील आपण मदत झाली पाहिजे, मदत झाली पाहिजे, हेदेखील तुम्ही आम्हाला सांगितलंय. आम्ही रात्री उशिरापर्यंत काम करत असतो, त्यामुळे राजसाहेब तुम्ही कधीही अगदी रात्री, मध्यरात्री अपरात्रीही आम्हाला भेटायला येऊ शकतात. आम्ही बिलकूल भेटणार, असे नाव घेता त्यांनी उद्धव ठाकरेंना टोला लगावला. तुमच्या शेतकऱ्यांच्या बाबत ज्या काही भावना आहेत, हे सरकार नक्कीच त्याचा आदर करेल, शेतकऱ्यांना सर्वसामान्यांना जेवढं काही देता येईल, तेवढं त्यांना देऊ, असेही यावेळी मुख्यमंत्री एकनाथ शिंदे हे राज ठाकरेंना यावेळी म्हणाले.