या गडावर मुंडे भावंडं परंपरेनुसार एकाच व्यासपीठावर येतात. मात्र धनंजय मुंडेंचा अपघात झाल्याने...
बीड, 15 जानेवारी : भाजपच्या नेत्या आणि माजी मंत्री पंकजा मुंडे या गेल्या काही दिवसांपासून भाजपमध्ये नाराज असल्याचे बोलले जात आहे. पण, आज बीडच्या पाटोदा तालुक्यातील लाखो भाविकांचे श्रद्धास्थान असणाऱ्या श्रीक्षेत्र गहिनीनाथ गडावर संत वामन भाऊंचा पुण्यतिथी सोहळा सुरू आहे. या 47 व्या पुण्यतिथी सोहळ्यानिमित्त राज्याचे मुख्यमंत्री एकनाथ शिंदे , उपमुख्यमंत्री देवेंद्र फडणवीस हे आज गहिनीनाथ गडावर येणार आहेत. त्यांच्यासोबत पंकजा मुंडे सुद्धा येणार आहे. संत वामनभाऊ यांचा 47 वा पुण्यतिथी सोहळा आहे. त्यानिमित्ताने उद्या गहिनीनाथ गडावर दर्शनासाठी राज्यातून लाखो भक्त येतात. याचनिमित्याने गहिनीनाथ गडावर मुख्यमंत्री एकनाथ शिंदे आणि उपमुख्यमंत्री देवेंद्र फडणवीस देखील हजेरी लावणार आहेत. गडावर दर्शनासाठी जाणारे शिंदे हे दुसरे मुख्यमंत्री आहेत. याआधी माजी मुख्यमंत्री दिवंगत विलासराव देशमुख हे 2007 मध्ये गडावर आले होते. महोत्सवाची संपूर्ण तयारी पूर्ण झाली असून 6 ते 7 लाख भाविक गडावर जमण्याची शक्यता असून तब्बल 500 क्विंटल महाप्रसाद बनविण्यात आला आहे. (Nitin Gadkari : नितीन गडकरींना आलेला धमकीचा फोन दुबई नाही तर.. प्रकरणाला नवीन वळण) या गडावर मुंडे भावंडं परंपरेनुसार एकाच व्यासपीठावर येतात. मात्र धनंजय मुंडेंचा अपघात झाल्याने यंदा धनंजय मुंडे हे गडावर जाणार नसल्याचे जाहीर करण्यात आले आहे. पंकजा मुंडे आणि प्रीतम मुंडे ह्या सकाळी दर्शनासाठी पोहचतील. देवेंद्र फडणवीस आणि पंकजा मुंडे पुन्हा एकदा एकाच व्यासपीठावर पाहायला मिळणार आहेत. त्यामुळे प्रत्येक नेत्यांच्या भाषणावर राज्याचे लक्ष असणार आहे. (शिंदे गटाच्या आमदार सोनवणेंना दिलासा, अपात्रतेबाबतची याचिका खंडपीठाने फेटाळली) मध्यंतरी, भाजपचे प्रदेशाध्यक्ष चंद्रशेखर बावनकुळे आणि देवेंद्र फडणवीस हे बीडमध्ये आले होते. दिवंगत नेते विनायक मेटे यांच्या संघटनेच्या वतीने व्यसनमुक्ती रॅलीचे आयोजन केले होते. या रॅलीला मात्र, पंकजा मुंडे गैरहजर होत्या. एवढंच नाहीतर राष्ट्रीय अध्यक्ष जेपी नड्डा हे औरंगाबाद दौऱ्यावर होते, त्यावेळी पंकजा मुंडे यांचं निमंत्रण पत्रिकेतून नाव वगळण्यात आलं होतं. या वादानंतर आज पंकजा मुंडे आणि फडणवीस हे एकाच व्यासपीठावर येणार आहे.