संग्रहित छायाचित्र
संजय शेंडे, प्रतिनिधी अमरावती, 20 मे : बातमी शिक्षण क्षेत्रात खळबळ उडवून देणारी आहे. राज्यातील पेपर फुटीचं सत्र काही थांबायचं नाव घेताना दिसत नाही. काही दिवसांपूर्वी डॉ. बाबासाहेब आंबेडकर मराठवाडा विद्यापीठाच्या पदवी परीक्षेत चक्क 300 ते 500 रुपयात मासकॉपी करून दिली जात असल्याचा प्रकार समोर आला होता. अशातच आता आणखी एका प्रकरणाने शिक्षण क्षेत्रातील ढिसाळ कारभार चव्हाट्यावर आला आहे. अमरावती येथील शासकीय विदर्भ ज्ञान विज्ञान संस्थेत उन्हाळी 2023 परीक्षेत विधी अभ्यासक्रमाच्या लॉ ट्रस्ट विषयाच्या चौथ्या सत्राचा मोबाईलद्वारे व्हाट्‌सअपवर पेपर लीक करण्यात आला. धक्कादायक म्हणजे यात एका भाजपच्या माजी नगरसेवकाचा हात आहे. याप्रकरणी भाजपचे माजी नगरसेवक प्रणीत सोनी, भूषण किसन हरकुट, किशोर पिंपळकर या तिघांना गाडगेनगर पोलिसांनी ताब्यात घेतले आहे. तर भाजपचे माजी नगरसेवक प्रणित सोनी यांनीच हा पेपर फोडल्याची धक्कादायक बाब पुढ आली आहे. संत गाडगेबाबा अमरावती विद्यापीठ संलग्नित शासकीय विदर्भ ज्ञान विज्ञान संस्थेत शनिवारी सकाळी 9 ते 12 या दरम्यान विधी अभ्यासक्रमाच्या लॉ ट्रस्ट विषयाचा फोर्थ सेमिस्टरचा पेपर होता. मात्र, पेपर सुरू होण्यापूर्वीच तो मोबाईलवर पोहोचला. तसेच या विषयाच्या झेरॉक्स सुद्धा या तिघांकडे आढळल्याचे बोलले जात आहे. पोलीस याप्रकरणी तपास करीत असून लॉ ट्रस्टचा पेपर लीक झाल्याची माहिती मिळताच अमरावती विद्यापीठाच्या परीक्षा व मूल्यांकन मंडळाच्या संचालक मोनाली तोटे व अमरावती विद्यापीठ व्यवस्थापन परिषदेचे सदस्य भैय्यासाहेब मेटकर यांनी घटनास्थळी धाव घेत झालेल्या प्रकाराची माहिती जाणून घेतली. वाचा - सीमा सुरक्षा दलामध्ये थेट कायदा अधिकारी होण्याची संधी; या उमेदवारांना प्राधान्य प्रणित सोनी याचा परीक्षा क्रमांक रूम नंबर 36 मध्ये होता तर त्यांचा मित्र हरकुट याचा क्रमांक रूम नंबर 37 मध्ये होता. मात्र, दोघेही रूम नंबर 36 मध्येच एकमेकांच्या मागे बसले व त्यांनी हा पेपर लीक करण्याचा प्रकार घडवून आणला. याप्रकरणी आता परीक्षा खोलीवर ड्युटी बजावणारे व दोषी विद्यार्थ्यांवरही पोलीस कारवाई केली जाणार असल्याची माहिती विदर्भ ज्ञान विज्ञान संस्थेचे प्रभारी संचालक यावले यांनी दिली आहे.