दिल्ली पोलिसांचा आतापर्यंतचा सर्वात मोठा खुलासा
नवी दिल्ली, 2 जानेवारी : नवीन वर्षाच्या पहिल्याच दिवशी दिल्लीत भयानक घटना घडली. सुलतानपुरी येथे 23 वर्षीय अंजलीचा हृदयद्रावक मृत्यू झाला. या संपूर्ण प्रकरणावर दिल्ली पोलिसांनी धक्कादायक खुलासा केला आहे. ज्यातून या प्रकरणाचं गांभीर्य आणखी वाढले आहे. दिल्लीचे स्पेशल सीपी सागर प्रीत हुड्डा यांनी पत्रकार परिषद घेत याची माहिती दिली. या प्रकरणी पाच आरोपींना अटक करण्यात आली. पोलिसांनी सांगितले की, मुलीला कारमधून 10 ते 12 किमीपर्यंत फरफटत नेले. वळण लागल्याने मुलीचा मृतदेह गाडीपासून वेगळा झाला. हुड्डा पुढे म्हणाले की, वैद्यकीय अहवाल, फॉरेन्सिक आणि कायदेशीर पथकाच्या अहवालाच्या आधारे कारवाई केली जाईल. पीडित महिला कुटुंबाच्या संपर्कात आहे. त्यांना तपासाची माहिती दिली जात आहे. आरोपींना तीन दिवसांची कोठडी सुनावण्यात आली आहे. त्यांची चौकशी केली जाईल. लवकरच तपास पूर्ण करणार, त्यानंतर कोर्टात आरोपपत्र सादर करणार. ठोस पुरावे गोळा करत असून आरोपींना कठोर शिक्षा देऊ, असं ते म्हणाले. आरोपीविरुद्ध कलम 279, 304, 120बी अन्वये गुन्हा दाखल करण्यात आला आहे. गाडीत अडकलेला मृतदेह वळण घेत असताना पडला पोलिसांनी सांगितले की, पाच आरोपींना अटक करण्यात आली आहे. यामध्ये दीपक खन्ना हे गाडी चालवत होते. ते ग्रामीण सेवेत कार्यरत आहेत. याशिवाय कारमध्ये अमित खन्ना, कृष्णा, मनोज आणि मिथुन बसले होते. CTCT फुटेज आणि डिजिटल पुरावे यांची टाइमलाइन तयार करेल. त्याआधारे आरोपी कुठून आले होते, कुठे जात होते, याचा शोध घेता येणार आहे. ओढत नेल्याबाबत पोलिसांनी सांगितले की, मृतदेह गाडीत अडकला होता. 10 ते 12 किमीपर्यंत फरफटत नेल्यानंतर कुठेतरी वळताना मृतदेह रस्त्यावर पडला. वाचा - चाकात अडकलेली तरुणी, यू-टर्न घेताना दिसली कार…पहाटे नेमकं काय घडलं? नव्या सीसीटीव्ही VIDEO मधून मोठा खुलासा त्यांनी सांगितले की सुलतानपुरी भागात एक स्कूटी सापडली आहे. घटनेच्या सर्व बाजू तपासणार आहोत. अनेक टीम तयार करण्यात आल्या आहेत. आरोपींना कठोर शिक्षा होईल. वैद्यकीय मंडळ स्थापन करण्यात आले आहे. सोमवारी फॉरेन्सिक विभागाचे पथक सुलतानपुरी येथे कार आणि स्कूटीची धडक झालेल्या ठिकाणी पोहोचले आणि पुरावे गोळा केले. क्राईम सीनसाठी पोलीस आरोपींना घटनास्थळ कांजवाला परिसरात घेऊन जाणार आहेत. काय प्रकरण आहे? दिल्लीतील कांझावाला येथे रविवारी पहाटे एका तरुणीचा मृतदेह विवस्त्र आढळून आला. शरीराचे अनेक भाग छिन्नविछिन्न झाले होते. पोलिसांचा दावा आहे की, कारमध्ये आलेल्या 5 तरुणांनी एका तरुणीला धडक दिली, त्यानंतर तिला 10 ते 12 किमीपर्यंत फरफटत नेले, ज्यामुळे तिचा मृत्यू झाला. मृतदेह मिळाल्यानंतर दिल्ली पोलिसांनी तपास केला असता, पोलिसांना घटनास्थळापासून काही अंतरावर एक स्कूटीही पडली होती, जी अपघातग्रस्त होती. स्कूटीच्या क्रमांकाच्या आधारे तरुणीची ओळख पटली.
पोलिसांच्या कारवाईवर कुटुंबीयांचे प्रश्न पोलिसांच्या कारवाईवर मी समाधानी नाही, असे मृत मुलीच्या मामाने सांगितले. डीसीपी म्हणाले की आरोपी मुलांनी काहीही चुकीचं केलं नाही. एवढ्या मोठ्या अपघातानंतर काही चुकले नाही का? हे प्रकरण निर्भयासारखेच आहे. आपण शंभर टक्के म्हणू शकतो की मुलीसोबत अघटीत घडलं आहे. स्कूटी एकीकडे तर दुसऱ्या ठिकाणी मृतदेह आढळला आहे. पोस्टमॉर्टम रिपोर्ट मिळण्यास विलंब होणार आहे. दरम्यान, कारवाईत हलगर्जीपणा होऊ शकतो, असा आरोप कुटुंबियांनी केला आहे.