बुलेट बाईक स्टोरी
कासिम खान, प्रतिनिधी नूंह, 22 जून : वाहतुकीचे नियम मोडल्यास चलनाच्या रूपात दंड भरावा लागतो, हे आपल्या सर्वांना माहीत आहे. पण तुमच्यासोबत असे कधी घडले आहे का, की तुम्ही कोणताही नियम मोडला नाही तरीही तुमचे दंड भरावा लागला. तेही एकदा नाही, दोन नाही, तीन नाही तर 14 वेळा. विश्वास बसत नाही ना? पण हे खरे आहे. एका तरुणासोबत असंच काहीसं घडलं आहे. हरियाणाच्या नूह जिल्ह्यातील नवाबगढच्या मुस्तफा खानसोबत हा प्रकार घडला आहे. वाहतुकीचे नियम न मोडता मुस्तफाला 14 चलन देण्यात आले. ही बाब माहिती होताच मुस्तफा खानच्या पायाखालची जमीन सरकली.
मुस्तफाने कधीही कोणताही नियम मोडला नाही किंवा कोणत्याही ट्रॅफिक सिग्नलकडे दुर्लक्ष केले नाही. तरीही त्याच्या दुचाकीसाठी 14 वेळा दंड करण्यात आला. मुस्तफा खानने सांगितले की, काही काळापूर्वी त्याला आपली बुलेट विकायची होती. त्यानंतर त्याला समजले की त्याच्या दुचाकीसाठी 14 चलन जारी करण्यात आले आहेत. हे कसे आणि केव्हा घडले हे मुस्तफा खानला जाणून घ्यायचे होते, तेव्हा त्याला कळले की हे चलन गाझियाबादमध्ये जारी करण्यात आले आहेत.
चालानची माहिती मिळाल्यानंतर मुस्तफाने गाझियाबादच्या पोलिस अधिकाऱ्यांशी संपर्क साधला. मुस्तफाने सांगितले की, तो कधीही गाझियाबादला गेला नाही तसेच कोणीही त्याची बाईक घेऊन हरियाणातून बाहेर गेला नाही, त्यामुळे चलन करण्याचा प्रश्नच उद्भवत नाही. त्यानंतर यूपी पोलिसांनी बुलेट मोटरसायकलचा शोध घेण्यास सुरुवात केली असता, अजित उर्फ आझाद यांचा मुलगा सत्यवीर सिंग (राजापूर, गाझियाबाद) याला पोलिसांनी बुलेट मोटरसायकलसह पकडले. त्याच्याकडून चोरीची दुचाकीही जप्त करण्यात आली आहे. त्यानंतर आरोपीने त्याच रंगाच्या बुलेट बाईकवर मुस्तफाच्या दुचाकीची नंबरप्लेट, चेसिस, इंजिन क्रमांक लावल्याचे निष्पन्न झाले. त्याचवेळी, आता आरोपी अजित उर्फ आझादचे चलन भरण्याची तयारी पोलीस करत आहेत. आरोपी पकडल्यानंतर मुस्तफाने सुटकेचा नि:श्वास सोडला.