''...तर पाकिस्तान सोडून भारतात जा'', इम्रान खान यांनी केलेल्या भारताच्या कौतुकावर पाकिस्तान नेता संतप्त

इस्लामाबाद, 09 एप्रिल: इम्रान खान (Imran Khan) यांनी अविश्वास प्रस्तावाला सामोरे जाण्यापूर्वी भारताचे (India) जे कौतुक केले, त्यामुळे पाकिस्तानच्या (Pakistan) विरोधकांची चांगलीच आग झाली आहे. विशेषत: पाकिस्तान मुस्लिम लीग-नवाज (PLM-N) च्या नेत्या मरियम नवाझ (Maryam Nawaz)यांनी भारताचे नाव ऐकल्यानंतर इतक्या संतप्त झाल्या की त्यांनी इम्रान खान यांना थेट पाकिस्तान सोडून भारतात जाण्याचा सल्ला दिला. इम्रान खान यांनी केलं होतं भारताचं कौतुक इम्रान खान यांनी शुक्रवारी देशाला संबोधित करताना भारताचे कौतुक केलं. रशियाबाबत आपलं धोरण काय असावं हे भारताला सांगण्याचे धाडस कोणत्याही युरोपियन राजदूतात नाही, असं ते म्हणाले होते. भारतातील जनता खूप प्रामाणिक असल्याचंही इम्रान खान यांनी म्हटलं. मात्र माजी पंतप्रधान नवाझ शरीफ यांची मुलगी मरियम नवाज यांना इम्रान यांनी भारताचे अशा प्रकारे केलेलं कौतुक पचनी पडलेलं नाही. सुप्रीम कोर्टाच्या निर्णयावर इम्रान यांनी खेदही व्यक्त केला होता. ‘जर तुम्हाला भारत इतका आवडत असेल तर तिथे जा’ मरियम नवाज शरीफ यांनी ट्विट करून म्हटलं आहे की, ’ खुर्ची जाताना पाहून वेडा झालेल्या या माणसाला कुणीतरी सांगावं की त्यांना आपल्याच पक्षाकडून हटवलं जात आहे. जर तुम्हाला भारत इतकाच आवडत असेल तर पाकिस्तानमधील आयुष्य सोडून भारतात जा. इतकंच नाही तर मरियम नवाझ शरीफ असंही म्हणाल्या की, भारताचे गुणगान करणाऱ्यानं हेही जाणून घेतलं पाहिजे की, भारताच्या वेगवेगळ्या पंतप्रधानांविरुद्ध 27 वेळा अविश्वास प्रस्ताव आणला गेला आहे. मात्र कोणीतरी संविधान, लोकशाही आणि त्याच्या तत्त्वांशी तडजोड केलेली नाही. वाजपेयी यांच्या नावाचा केला उल्लेख भारताचे माजी पंतप्रधान अटलबिहारी वाजपेयी यांचा उल्लेख करत मरियम म्हणाल्या की, एका मतानं पराभूत झाल्यानंतर ते घरी गेले होते. त्यांनी तुमच्या (इमरान खान) सारखे देश आणि राज्यघटना गहाण ठेवली नव्हती. विशेष म्हणजे, गुरुवारी, पाकिस्तानच्या सर्वोच्च न्यायालयाने उपसभापती कासिम सूरी यांनी विरोधकांनी मांडलेला अविश्वास प्रस्ताव फेटाळणे चुकीचे असल्याचे म्हटलं होतं. न्यायालयाच्या आदेशावर आज इम्रान खान यांना अविश्वास प्रस्तावाला सामोरे जावे लागणार आहे.

• Follow us on