)
मुंबई, 18 एप्रिल : आयपीएल 2023 मध्ये 24 वा सामना सोमवारी चेन्नई सुपरकिंग्स विरुद्ध रॉयल चॅलेंजर्स बँगलोर यांच्यात खेळवण्यात आला. या सामन्यात चेन्नईने आरसीबीचा 8 धावांनी पराभव केला असला तरी, चेन्नईचे गोलंदाज करत असलेल्या गोलंदाजीबद्दल स्वःत धोनीनंतर आता माजी क्रिकेटर वीरेंद्र सेहवागने देखील नाराजी व्यक्त केली आहे. यंदा आयपीएलमध्ये चेन्नई सुपरकिंग्सच्या गोलंदाजीमध्ये अनेक त्रुटी जाणवत आहेत. संघाचे गोलंदाज सतत वाईड आणि नो बॉल टाकत असल्याने लखनौ सुपरजायंट्स विरुद्धच्या सामन्यात देखील चेन्नई सुपरकिंग्सला याचा फटका बसला होता. यावेळी धोनीने चेन्नईच्या गोलंदाजांना याबाबत सूचना करून आपली कामगिरी सुधरवण्याचा सल्ला दिला होता. परंतु एवढे होवून देखील कर्णधाराच्या सल्ल्याकडे दुर्लक्ष करून चेन्नईच्या गोलंदाजांनी आरसीबी विरुद्ध खेळवण्यात आलेल्या सामन्यात 11 अतिरिक्त धावा दिल्या, ज्यात 6 वाइड चेंडूंचा समावेश होता. माजी क्रिकेटर वीरेंद्र सेहवागनेही याबाबत चिंता व्यक्त केली आहे.
वीरेंद्र सेहवागने चेन्नई सुपर किंग्जच्या गोलंदाजांना इशारा दिला की, ते अशीच गोलंदाजी करत राहिले तर कर्णधार महेंद्र सिंह धोनी वर स्लो ओव्हर रेटमुळे बंदी घातली जाऊ शकते. सेहवाग म्हणाला, आरसीबीवर विजय मिळवूनही धोनी खूश दिसत नव्हता कारण गोलंदाजांनी नो आणि वाईड बॉलची संख्या कमी करावी असे त्याने यापूर्वीही सांगितले असताना गोलंदाजांनाकडून त्या गोष्टीचे पालन झाले नाही. चेन्नईच्या गोलंदाजांनी त्यांच्या नो आणि वाईड बॉलवर नियंत्रण मिळवले नाही तर यामुळे कर्णधार धोनीवर बंदी घातली जाऊ शकते आणि असे झाल्यास संघाला कर्णधाराशिवाय मैदानात उतरावे लागते. तेव्हा चेन्नईच्या गोलंदाजांनी वेळीच आपल्या कामगिरीत सुधारणा करावी असा सल्ला वीरेंद्र सेहवागने दिला.
+6
फोटो
