PHOTOS: सरिस्का व्याघ्र प्रकल्पाच्या जंगलात भीषण आग, हेलिकॉप्टरने आग विझवण्याचे प्रयत्न
राजस्थानमधील अलवर जिल्ह्यात असलेल्या देशातील प्रसिद्ध सरिस्का व्याघ्र प्रकल्पात (Sariska Tiger Reserve) गेल्या दोन दिवसांपासून वनवा (Fire) पेटला आहे. सरिस्का अभयारण्यातील अकबरपूर पर्वतरांगेतील जंगलात रविवारी लागलेली आग मंगळवारी सायंकाळपर्यंत आटोक्यात येऊ शकली नाही. आग आटोक्यात आणण्यासाठी रविवारी सकाळपासून हवाई दलाचे दोन हेलिकॉप्टर (Air Force Helicopter) आटोक्यात आणण्याचे प्रयत्न करत होते, मात्र अजूनही जंगलातून आगीच्या ज्वाला बाहेर येत आहेत.
सरिस्का सीसीएफ आरएन मीना यांनी दिलेल्या माहितीनुसार, अकबरपूर रेंजमधील पृथ्वीपूर भागात 27 मार्च रोजी आग लागली होती. ती हळूहळू पसरत गेली. आगीवर नियंत्रण मिळवण्यासाठी सातत्याने प्रयत्न सुरू आहेत. आग विझवण्यासाठी हवाई दलाची दोन हेलिकॉप्टर कार्यरत आहेत. त्यांच्याशिवाय वनविभागाचे कर्मचारी आणि ग्रामस्थही आगीवर नियंत्रण मिळवण्याचा प्रयत्न करत आहेत. या कामात सुमारे 250 लोक सहभागी आहेत. ही आग 8 ते 10 किलोमीटर परिसरात पसरली आहे.
आगीमुळे जंगल नष्ट होण्याबरोबरच अनेक वन्यप्राणीही याला बळी पडत आहेत. त्याचवेळी, सरिस्का व्याघ्र प्रकल्पातील वाघिणी ST-17 आणि तिचे दोन पिल्लेही आगग्रस्त भागात असल्याची माहिती आहे. याशिवाय आणखी दोन वाघही या भागात असल्याची माहिती आहे. वाघांसोबतच सर्व प्राण्यांना वाचवण्यासाठी सर्वतोपरी प्रयत्न सुरू असल्याचे सरिस्का प्रशासनाचे म्हणणे आहे.
