तुम्ही क्रेडिट कार्डचं पेमेंट करताना ही चूक करताय? मग आताच सुधारा

Personal Finance : आजकाल क्रेडीट कार्डचा वापर जवळपास प्रत्येकजण करतो. बँकांकडूनही यासाठी विविध योजनांद्वारे प्रोत्साहन दिलं जातं. क्रेडीट कार्डवरून खरेदी केल्यास बँक त्या पैशांवर ३० ते ४५ दिवसांपर्यंत व्याज घेत नाही. तसच क्रेडिट कार्डवरून पैसे भरल्यास अनेक ऑफर्स आणि डिस्काउंटसुद्धा ग्राहकांना मिळतो.

बँक क्रेडिट कार्ड सर्विसचे अनेक फायदे ग्राहकांना सांगते. मात्र या सेवा वापरत असताना छुपे चार्जेस आणि अटींचा उल्लेख फारसा करत नाही. क्रेडिट कार्डचं असंच एक फीचर आहे ते म्हणजे मिनिमम ड्यू. या सेवेचे लाभ ऐकायला बरे वाटतात पण ग्राहकांच्या खिशाला जास्त फटका बसतो.

मिनिमम ड्यू किमान थकीत रक्कम असते ज्याची परतफेड न केल्यास तुमच्या व्याजासह बँक पेनल्टीही लागते. मिनिमम ड्यू तुम्ही खर्च केलेल्या एकूण रकमेच्या जवळपास ४ ते ५ टक्के असते. मिनिमम ड्यू रक्कम भरल्यानंतर मोठी रक्कम परतफेड करण्याच्या दबावातून एकदा वाचता. पण हे ग्राहकाच्या फायद्याचं आहे असं म्हणता येणार नाही.

मिनिमम ड्यू रक्कम भरल्यास बँक उरलेल्या रकमेवर जास्त व्याज लावतात. शिल्लक रक्कम भरण्यात जितके दिवस जास्त जातील तेवढंच व्याजही वाढतं. तुम्हाला वर्षाला 30-40 टक्के जास्त व्याज द्यावं लागेल.

जर तुम्ही मिनिमम ड्यु रक्कम भरल्यानंतर पुन्हा क्रेडिट कार्डने खरेदी केल्यास तुम्हाला व्याज मुक्त कालावधीचा लाभही मिळत नाही. तसंच व्याजही खरेदी केल्याच्या दिवसापासून लावण्यात येते.

मिनिमम ड्यू रक्कम भरत राहिल्याने कर्ज तसेच राहते. तुम्ही भविष्यात सर्व रक्कम भरली तरी याचा सिबिल रिपोर्टवर परिणाम होतो. सतत मिनिमम ड्यू भरणाऱ्यांबद्दल बँक असं मानते की यांच्याकडे लिक्विडिटीची कमतरता आहे.

मिनिमम ड्यू रक्कम भरल्यामुळे क्रेडिट लिमिटवरही नकारात्मक परिणाम होतो. सतत कमी रक्कम भरत राहिल्याने जितकी रक्कम कमी भरण्यात येते तेवढंच क्रेडिट लिमिटही कमी केलं जातं.

सतत मिनिमम ड्यू भरल्याने बँक तुम्हाला मिनिमम ड्यू ५ टक्क्यांच्या जागी १० टक्केसुद्धा करू शकते. कारण मिनिमम ड्यू तुमच्या मूळ कर्जावर अवलंबून असते.