मोदी सरकारकडून स्वस्तात सोने खरेदी करण्याची सुवर्णसंधी! घेऊ शकता या योजनेचा लाभ

भारत सरकारच्या सॉव्हरेन गोल्ड बाँड (Sovereign gold bond)योजनेचा पुढचा टप्पा 6 जुलैपासून सुरू होणार आहे. याआधीच्या टप्प्यात तुम्ही जर गुंतवणूक करू शकले नसाल तर या टप्प्यात गुंतवणूक करण्याची संधी आहे.

सरकारी गोल्ड बाँड स्कीम 2020-21 सीरीज-4 चे सब्सक्रिप्शन 6 जुलै 2020 रोजी सुरू होणार आहे. रिझर्व्ह बँक ऑफ इंडियाने (RBI) केलेल्या घोषणेनुसार सॉव्हरेन गोल्ड बाँड 20 एप्रिल ते 2 सप्टेंबर 2020 पर्यंत एकूण सहा टप्प्यांमध्ये जारी करण्यात येणार आहेत.

आरबीआय भारत सरकारतर्फे हे गोल्ड बाँड जारी करणार आहे. या सीरिजसाठी गोल्ड बाँडची इश्यू करण्यात आलेली किंमत 4,852 रुपये प्रति ग्रॅम आहे.

याआधी 8 जून ते 12 जूनदरम्यान जारी करण्यात आलेल्या गोल्ड बाँडची किंमत 4,677 रुपये प्रति ग्रॅम होती.

रिझर्व्ह बँकेने दिलेल्या माहितीनुसार, इश्यू प्राइस सब्सक्रिप्शनच्या आधीच्या आठवड्यात शेवटच्या तीन व्यवहाराच्या दिवसांसाठी IBJA कडून जारी करण्यात आलेल्या 999 शुद्धतेच्या सोन्याच्या किंमतीची सरासरी काढून निश्चित केली जाते. यासाठी बाजार बंद होताना जी किंमत असते ती ग्राह्य धरली जाते.

त्याचप्रमाणे ऑनलाइन पेमेंट केल्यास प्रत्येक बाँडमधील प्रति ग्रॅम सोन्यावर 50 रुपयांची सूट देण्यात आली आहे. म्हणजे ऑनलाइन अर्ज करून सोने खरेदी केल्यास प्रति ग्रॅम 4,802 रुपयांनी सोने खरेदी करता येईल.

या योजनेअंतर्गत कमीत कमी 1 ग्रॅम सोन्याची गुंतवणूक करता येऊ शकेल. यामध्ये गुंतवणूक करताना तुम्ही एका आर्थिक वर्षामध्ये 500 ग्रॅम सोन्याचे बाँड खरेदी करू शकता. कमीतकमी गुंतवणूक 1 ग्रॅमची आहे.

Sovereign Gold Bond ची विक्री बँक, स्टॉक होल्डिंग कॉर्पोरेशन ऑफ इंडिया लिमिटेड, निवडण्यात आलेले पोस्ट आणि एनएसई तसच बीएसईच्या माध्यमातून होते. यातील कोणत्याही ठिकाणी जाऊन तुम्ही बाँड योजनेमध्ये सामील होऊ शकता.

सोन्याचे दराने यावर्षी रेकॉर्ड तोडले आहेत. अशावेळी असा अंदाज व्यक्त केला जात आहे की, यावर्षी सोन्याच्या किंमती 53 हजाराचा टप्पा गाठू शकतात. त्यामुळे सॉव्हरेन गोल्ड बाँड स्कीमला चांगला प्रतिसाद मिळतो आहे.