Air India Property Auction: आज मुंबईमध्ये स्वत:चं घर खरेदी करण्याची संधी, या ठिकाणीही मिळेल स्वस्तात प्रॉपर्टी

तुम्ही दिल्ली किंवा मुंबईसारख्या मोठ्या शहरात घर घेण्याचा (Own flat or property) विचार करत असाल तर तुमच्यासाठी सुवर्णसंधी आहे. विमानकंपनी एअर इंडिया (Air India) आता देशभरात त्यांच्या विविध प्रॉपर्टीजना विकण्याची योजना आखत आहे.

यामध्ये फ्लॅट आणि अन्य काही कमर्शिअर मालमत्तेचाही (residential, commercial and plots) समावेश आहे. या माध्यमातून 270 कोटी जमा करण्याचा एअर इंडियाचा मानस आहे. देशातील मोठ्या 10 शहरांमध्ये ही प्रॉपर्टी आहे

कंपनीकडून याकरता ई-लिलावाचे (Online auction)आयोजन करण्यात येणार आहे. हा लिलाव 8 जुलै, 2021 रोजी सुरू होणार असून 9 जुलै रोजी संपेल. आज दुपारी 2 वाजता या लिलावास सुरुवात होणार असून तो उद्या दुपारी अडीच वाजता संपेल.

13.3 लाख रुपये असेल सुरुवातीची बोली- मनीकंट्रोलमधील वृत्तानुसार, या यूनिट्सची सुरुवातीची बोली 13.3 लाख रुपये असेल. ग्राहकांना जवळपास 150 कोटी रुपयांपर्यंत बोली लावता येणार आहे. या लिलावामध्ये अशाही काही संपत्ती आहेत ज्या आधीही अनेकदा विक्रीसाठी ठेवण्यात आल्या होत्या.

एअर इंडियाने जारी केलेल्या नोटीसनुसार, मुंबईमध्ये एक रहिवासी प्लॉट आणि फ्लॅट, नवी दिल्लीमध्ये पाच फ्लॅट, बंगळुरुमध्ये एक रहिवासी प्लॉट आणि कोलकातामध्ये चार फ्लॅट आहेत. कंपनी या सर्व मालमत्ता विकणार आहे.

याशिवाय औरंगाबादमध्ये एक बुकिंग कार्यालय आणि स्टाफ क्वार्टर, नाशिकमध्ये सहा फ्लॅट, नागपूरमध्ये बुकिंग ऑफिस, भुजमध्ये एअरलाइनचं हाउस आणि एक रहिवासी फ्लॅट तर तिरुवनंतपुरममध्ये एक रहिवाशी फ्लॅट आणि मंगळुरुमध्ये दोन फ्लॅट आहेत.

10 टक्क्यांपर्यंत मिळेल सूट- एअर इंडियाने ग्राहकांना आकर्षित करण्यासाठी यापैकी काही संपत्ती, विशेषत: टिअर 1 शहरातील आरक्षित मुल्य कमी केलं आहे. अर्थात टिअर 1 शहरात ही एअरलाइन कंपनी संपत्ती खरेदी करण्यावर विशेष सवलत देत आहे. एअर इंडियाच्या एका अधिकाऱ्याने अशी माहिती दिली आहे की, या संपत्तींमध्ये जवळपास 10 टक्क्यांची कपात करण्यात आली आहे.