पुन्हा सुरू होणार Oxford च्या कोरोना लशीची चाचणी; का थांबवलं होतं कंपनीने ट्रायल वाचा

सर्व जगाचं लक्ष लागलेल्या Oxford कोरोना लशीची चाचणी पुन्हा सुरू होणार आहे. चार दिवसांतच कंपनीने पुन्हा ट्रायल सुरू करण्याचा निर्णय घेतला आहे.

ब्रिटनच्या Medicines Health Regulatory Authority (MHRA)ने पुन्हा परवानगी दिल्याचं सांगितलं आहे.

ब्रिटनमध्ये ट्रायल सुरू असताना ज्या व्यक्तीला ही लस दिली तिची प्रकृती बिघडली, त्यामुळे ब्रिटन आणि त्यानंतर भारतातही लशीची मानवी चाचणी तात्पुरती थांबवण्यात आली होती.

आज तकच्या रिपोर्टनुसार लस दिलेल्या यूकेतील महिलेच्या पाठीच्या मणक्यातील हाडाला गंभीर सूज आली आहे. असं खूप कमी पाहायला मिळतं. त्यामुळेच ट्रायल रोखल्याचं कंपनीनं सांगितलं होतं. 

अ‍ॅस्ट्रॅजेनेका (AstraZeneca), ऑक्सफर्ड युनिव्हर्सिटी (Oxford university) ने तयार केलेली ही लस. ज्यामध्ये पुण्यातील सीरम इन्स्टिट्युटचीही (serum institute) भागीदारी आहे.

बुधवारी अ‍ॅस्ट्रॅजेनेका तर गुरुवारी सीरमने इन्स्टीट्युटनेही या लशीचं ट्रायल थांबवण्याचा निर्णय घेतला होता. 

त्यावर तज्ज्ञांची एक समिती स्थापन करण्यात आली होती. या समितीने आपला अहवाल दिला असून त्यात चाचण्या पुन्हा सुरू करण्यास हरकत नाही अशी शिफारस केली आहे.