फक्त 45 मिनिटांच्या व्यायामाने खुलवा त्वचेचं सौंदर्य

आपल्या त्वचेचं सौंदर्य खुलवण्यासाठी केवळ ब्युटी प्रॉडक्ट्स न वापरता निरोगी जीवनशैली आणि पोषक आहाराचे सेवन केल्यास नक्कीच नैसर्गिकरित्या सौंदर्य खुलवता येतं.

कोरोना लॉकडाऊनमुळे घरबसल्या आपल्या त्वचेवर लावण्यात येणा-या रासायनिक उत्पादनांचा वापर कमी झाला आणि आपली त्वचा मोकळा श्वास घेऊ लागली.

कोरोना लॉकडाऊनमुळे बाह्य उत्पादनांचा वापर न करता नैसर्गिकरित्यादेखील त्वचा स्वच्छ आणि सुंदर राहू शकते याचा प्रत्यय आला आहे.

त्वचा नैसर्गिकरित्या कशी सुंदर ठेवता येईल यासाठी द एस्थेटिक क्लिनिक्सच्या त्वचारोग सल्लागार आणि कॉस्मेटिक त्वचारोग तज्ज्ञ डॉ. रिंकी कपूर यांनी काही टिप्स दिल्या आहेत.

आठवड्यातून तीन वेळा 45 मिनिटं व्यायाम केल्यास आपली त्वचा निरोगी आणि चमकदार राहील. व्यायामाचा एक नित्यक्रम आखून त्यानुसार न चूकता व्यायाम करा. आपल्याला लवकरच फरक दिसेल.

जर आपण पुरेशी झोप घेत नसाल तर त्याचे दुष्परिणाम त्वचेवर जाणवू लागतात. डोळ्याखाली काळी वर्तुळे, सुरकुत्या आणि थकवा दिसून येतो. त्यामुळे दररोज रात्री किमान 7 तास झोप घ्या

हायड्रेट राहा. ठराविक अंतराने पाणी प्या. आहारात काकडी, टोमॅटो, कोबी, द्राक्षं आणि टरबूज यांचा समावेश करा. त्वचेची आर्द्रता योग्य राखल्यास त्वचा निरोगी आणि चमकदार दिसते.

तणावापासून दूर राहा. ताणामुळे कॉर्टिसॉल हार्मोन्सची निर्मिती जास्त होते ज्यामुळे त्वचा कोरडी पडते, सुरकुत्या येतात. तणावमुक्त राहण्यासाठी स्वतःसाठी वेळ द्या आणि पुरेसा आराम करा.

मीठ, साखर, मध आणि नारळ तेल यांचं मिश्रण तयार करा. हे मिश्रण आठवड्यातून दोनदा त्वचेवर लावून मृत त्वचा काढून टाका.

द्राक्षं अर्ध कापून घ्या आणि त्वचेवर चोळा. जेणेकरून त्वचा स्वच्छ होईल.

चेहऱ्यावरील छिद्रं बंद करण्यासाठी फेस मास्कचा वापर करा. पपईचा मास्क वापरा.

सूर्यापासून संरक्षण करणारे मॉईश्चरायझर वापरा

केस कोरडे होत असतील तर रिकाम्या स्प्रे बॉटलमध्ये 1 चमचा सी सॉल्ट 200 मिली पाण्यात मिसळा आणि त्यात लेव्हेंडर तेलाचे 8 थेंब घाला. ओलसर केसांवर स्प्रे करा. केसांमधील कोरडेपणा दूर होईल.

अर्धा कप मेयो घ्या आणि ओल्या केसांवर लावा. 15 मिनिटांनंतर केस स्वच्छ धुवा.