इरफान खान हा भारतीय सिनेसृष्टीतील सर्वोत्कृष्ट अभिनेत्यांपैकी एक म्हणून ओळखला जायचा. 29 एप्रिल 2020 साली कर्करोगामुळं त्याचं निधन झालं. आज त्याचा पहिला पुण्यतिथी आहे. या निमित्तानं जगभरातील चाहत्यांनी त्याच्या आठवणींना उजाळा दिला आहे. इरफानचं पूर्ण नाव साहबजादे इरफान अली खान असं होतं. जयपूरमधील एका मध्यमवर्गीय कुटुंबात त्याचा जन्म झाला होता. त्यानं नॅशनल स्कूल ऑफ ड्रामामधून अभिनयाचं शास्त्रशुद्ध शिक्षण घेतलं होतं. ‘लाइफ इन अ मेट्रो’, ‘पानसिंग तोमर’, ‘द लंचबॉक्स’, ‘हैदर’, ‘गुंडे’, ‘पिकू’, ‘तलवार’, ‘हिंदी मीडियम’ यांसारख्या अनेक चित्रपटांद्वारे त्यानं आपल्या दमदार अभिनयाचं प्रदर्शन करुन प्रेक्षकांचं मनोरंजन केलं होतं. विशेष म्हणजे त्यानं केवळ बॉलिवूडच नाही तर हॉलिवूड सिनेसृष्टीतही आपल्या दमदार अभिनयाची छाप सोडली होती. त्यानं द अमेझिंग स्पायडरमॅन, लाईफ ऑफ पाय, न्यूयॉर्क, ज्युरॅसिक पार्क यांसारख्या अनेक विदेशी चित्रपटांमध्ये महत्वाच्या भूमिका साकारल्या होत्या. जवळपास 30 वर्षांच्या करिअरमध्ये इरफानने 50 पेक्षा अधिक चित्रपटांमध्ये काम केलं आहे. कलाक्षेत्रातील अभूतपूर्व कामगिरीसाठी 2011 मध्ये ‘पद्मश्री’ पुरस्कार देऊन त्याचा गौरव करण्यात आला होता. सुरुवातीच्या दिवसांमध्ये त्यानं प्रचंड संघर्ष केला. मालिकांमध्ये मिळणारा लहानसहान भूमिका करुन त्यानं करिअरची सुरुवात केली होती.
