Bipasha Basu: बंगाली पद्धतीने झालं बिपाशा बसूचं बेबी शॉवर; सिल्क साडीत दिसली अभिनेत्री

बॉलिवूड अभिनेत्री बिपाशा बसू सध्या तिच्या प्रेग्नेंसीचा आनंद घेत आहे. बिपाशा आणि पती-अभिनेता करण सिंह ग्रोव्हर पहिल्यांदाच आईबाबा बनणार आहेत.

आपल्या आयुष्यातील या नव्या इनिंगसाठी हे जोडपं खूपच उत्सुक आहे. बिपाशा सतत सोशल मीडियावर फोटो आणि व्हिडिओ शेअर करत आपल्या प्रेग्नेंसी काळातील विविध गोष्टी शेअर करत असते.

बिपाशाने नुकतंच इन्स्टाग्राम अकाउंटवर फोटो आणि व्हिडीओ शेअर करत आपल्या बेबी शॉवरची झलक दाखवली आहे.

बिपाशा मूळची बंगाली आहे. त्यामुळे हे बेबी शॉवर सेलिब्रेशन बंगाली चालीरितीनुसार करण्यात आलं आहे. बंगाली भाषेत, या विधीला 'साध' म्हणतात.

या कार्यक्रमामध्ये प्रेग्नेंट महिलेला तिच्या आवडीचे पदार्थ मोठ्या प्रेमाने खायला दिले जातात. या काळात तिचे जवळचे आणि आवडते लोक स्त्रीभोवती राहतात. जेणेकरून तिला सकारात्मक ऊर्जा मिळू शकेल.

बिपाशा बसूने एक व्हिडिओ पोस्ट करत बंगालीमध्ये लिहलंय, "माझं साध... धन्यवाद आई." बिपाशाची आई ममता बसू आणि सासू दीपा सिंह यांनी तिला ओवाळून कपाळावर टिळा लावल्याचं दिसून येत आहे.

या बेबीशॉवर सोहळ्यात बिपाशा बसू एकदम पारंपरिक अंदाजात दिसून आली. यावेळी तिने गुलाबी रंगाची सिल्क साडी नेसली होती.

बिपाशा बसू आणि करण सिंह ग्रोव्हरचे हे फोटो सध्या सोशल मीडियावर प्रचंड व्हायरल होत आहेत.