)
नवी दिल्ली, 10 जुलै : देशातील 25 राज्यं आणि केंद्रशासित प्रदेशांमध्ये न्यूज18 नेटवर्कने केलेल्या सर्व्हेक्षणात 8,035 मुस्लिम महिलांचं मत जाणून घेतलं. भारतात यूनिफॉर्म सिव्हिल कोड लागू होणार आहे, त्या पार्श्वभूमीवर न्यूज 18 नेटवर्कने सर्वांत मोठा सर्व्हे केला आहे. मुस्लिम पुरुषांना चार लग्नं करण्याचा अधिकार नसावा असं मत 8,035 पैकी 6,146 महिलांनी व्यक्त केलं. न्यूज18 नेटवर्कने केलेल्या भारतातील सर्वात मोठ्या युनिफॉर्म सिव्हिल कोडसंबंधी (UCC) सर्वेक्षणात असं आढळून आलंय की 76% मुस्लिम महिलांना समाजातील पुरुषांना चार बायका करण्याचा अधिकार मिळावा असे वाटत नाही. UCC चा उल्लेख न करता, News18 च्या 884 पत्रकारांनी देशातील 25 राज्यं आणि केंद्रशासित प्रदेशांमधील 8,035 मुस्लिम महिलांच्या UCC संदर्भातील मुलाखती घेतल्या. यामध्ये समान नागरी कायद्यात समाविष्ट विषयांवर त्यांना प्रश्न विचारण्यात आले. सर्वेक्षणात सहभागी झालेल्या मुस्लिम महिला 18-65+ कॅटेगरीतल्या होत्या. तसंच त्या सर्व प्रदेश, समुदाय, शैक्षणिक आणि वैवाहिक स्थिती, निरक्षर ते पोस्ट ग्रॅज्युएशन पूर्ण केलेल्या होत्या. UCC हा कायदा सर्व धार्मिक समुदायांना विवाह, घटस्फोट, वारसा, दत्तक घेणे, देखभाल करणे या सर्व गोष्टींबाबत एकसमान पद्धतीने लागू होईल. UCC बद्दल केंद्र सरकारचा कायदा आयोग ऑल इंडिया मुस्लिम पर्सनल लॉ बोर्डाशी नव्याने चर्चा करेल अशी घोषणा केलेल्या घोषणेनंतर अनेक मुस्लिम संघटना त्याला तीव्र विरोध दर्शवला. ऑल इंडिया मुस्लिम पर्सनल लॉ बोर्डानी म्हटलंय की, यूसीसी लागू करण्यासाठी एखाद्या मतचाचणीतील बहुमत (Majoritarian Morality) हे अल्पसंख्य समाजाचं धार्मिक स्वातंत्र्य व अधिकारांपेक्षा वरचढ आहे असं म्हणणं योग्य नाही. त्यानंतर या संदर्भात मुस्लिम महिलांचं काय म्हणणं आहे, हे जाणून घेण्याचा प्रयत्न न्यूज18 नेटवर्कने केला कारण सद्यस्थितीतील कायद्याचा सर्वाधिक त्रास मुस्लिम महिलांना भोगावा लागत आहे. मुस्लिम पुरुषांच्या चार लग्नांसाठी 18-44 वयोगटातील सुशिक्षित महिलांचा नकार. मुस्लिम पुरुषांना चार स्त्रियांशी लग्न करण्याचा अधिकार असावा का असं विचारलं असता, 76% म्हणजेच 6,146 महिलांनी ‘नाही’, 1,400 म्हणजेच 17% महिलांनी ‘हो’ म्हटले, तर 489 (6%) महिलांनी ‘माहित नाही किंवा सांगू शकत नाही’ असं म्हटलं. नाही म्हणणाऱ्या सर्वाधिक महिला या 18-44 वयोगटातील ग्रॅज्युएट्स होत्या. 18-44 वयोगटातील 78% (4,907) महिलांनी ‘नाही’, 17% (1,055) ‘होय’ आणि 5% (333) ‘माहित नाही किंवा सांगू शकत नाही’ असं म्हटलं. 44+ वयोगटाच्या बाबतीत, 71% (1,239) ‘नाही’, 20% (345) ‘हो’ म्हणाल्या आणि 9% (156) ‘माहित नाही किंवा सांगू शकत नाही’ म्हणाल्या. ग्रॅज्युएट्सच्या बाबतीत 79% (2,385) ‘नाही’, 16% (490) ‘होय’ आणि 5% (158) ‘माहित नाही किंवा सांगू शकत नाही’ म्हणाल्या. सर्वेक्षण केलेल्या महिलांपैकी 19% 18-24 वयोगटातील, 33% 25-34 वयोगटातील, 27% 35-44 वयोगटातील, 14% 45-54 वयोगटातील, 5% 55-64 वयोगटातील आणि 2% 65 पेक्षा जास्त वयाच्या होत्या. यापैकी 70% विवाहित, 24% अविवाहित, 3% विधवा आणि 3% घटस्फोटित होत्या. यापैकी एकूण 73% सुन्नी, 13% शिया आणि 14% इतर समुदायातील महिला होत्या. सर्वेक्षण केलेल्या महिलांमध्ये 11% पोस्ट ग्रॅज्युएट्स, 27% ग्रॅज्युएट्स, 21% 12+ पर्यंत शिक्षण घेतलेल्या, 14% 10+ पर्यंत शिक्षण घेतलेल्या, 13% 5-10 वी पर्यंत शिक्षण घेतलेल्या, 4% 5 वी पर्यंत शिकलेल्या, 4% निरक्षर होत्या आणि 4% मूलभूत साक्षर होत्या.
मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
+6
फोटो
