रचला इतिहास! महाराष्ट्राच्या डॉ. माधुरी कानिटकर लेफ्टनंट जनरल पदी

नवी दिल्ली, 1 मार्च : मेजर जनरल डॉ. माधुरी कानिटकर यांना शनिवारी लेफ्टनंट जनरल पदावर बढती देण्यात आली. गेल्या वर्षीय कानिटकर यांची लेफ्टनंट पदी निवड झाली होती, जागा रिक्त झाल्यानंतर शनिवारी त्यांनी पदभार स्वीकारला. या पदावर निवड झालेल्या त्या महाराष्ट्रातील पहिल्या तर देशातील तिसऱ्या महिला अधिकारी ठरल्या आहेत. नवी दिल्ली येथे त्यांनी एकात्मिक संरक्षण विभागाच्या उपप्रमुख (इंटीग्रेटेड डिफेन्स सर्व्हिसेस) म्हणून सुत्रं हाती घेतली आहेत. लेफ्टनंट जनरलपद भूषवण्याचा पहिला मान पुनिता अरोरा यांचा आहे. यानंतर पद्मावती बंडोपाध्याय या पहिल्या महिला एअर मार्शल ठरल्या. आता माधुरी कानिटकर या लेफ्टनंट जनरल झाल्या आहेत.

Delhi: Lieutenant General Madhuri Kanitkar today put on her ranks after her promotion. She is the third woman officer in the Indian armed forces to have become Lieutenant General. She has now been posted to Headquarters, Integrated Defence Staff under the Chief of Defence Staff. pic.twitter.com/JzcckVucmQ

— ANI (@ANI) February 29, 2020

सर्वोच्च न्यायालयाचा क्रांतिकारी निर्णय

काही दिवसांपूर्वी सर्वोच्च न्यायालयाच्या निर्णयामुळे तळप्रमुखासारख्या नेतृत्वपदी महिलांच्या नियुक्तीची मार्ग मोकळा झाला होता. महिला लष्करी अधिकाऱ्यांनी सर्वोच्च न्यायालयाच्या या आदेशाचे स्वागत केले होते. लष्करामध्ये लिंगाधारित भेदभाव संपवण्यासाठी सरकारने आपल्या मानसिकतेत बदल करण्याची गरज सर्वोच्च न्यायालयाने व्यक्त केली होती.

डॉ. माधुरी कानिटकर यांच्याविषयी -

कानिटकरांनी १९८० मध्ये एमबीबीएसमधून पदवी घेतली. त्यांचे शिक्षण पुण्यातील आर्म फोर्सेस मेडिकल कॉलेजमध्ये झाले. तेथे असताना त्यांना राष्ट्रपतींच्या हस्ते सुवर्णपदक मिळाले होते. त्यांनी पेडियाट्रिकमध्ये पदवीचे शिक्षण घेतले. अखिल भारतीय आयुर्विज्ञान केंद्रातून त्यांनी बालकांच्या मूत्रपिंड विकारांवरील उपचाराचे प्रशिक्षण घेतले. माधुरी कानिटकर या पुण्यातील लष्करी महाविद्यालयाच्या पहिल्या अधिष्ठाता होत्या. पुणे आणि दिल्लीत त्यांनी मूत्रपिंड विकारावर उपचारासाठी केंद्रे सुरू केली आहेत. कानिटकर यांचे पती राजीव कानिटकर लष्करात लेफ्टनंट जनरल होते. ते नुकतेच निवृत्त झाले आहेत. दाम्पत्याने लष्करात लेफ्टनंट जनरलपद स्वीकारल्याची ही पहिलीच घटना आहे.