)
मुंबई, 4 एप्रिल : कोरोनाची भयावह परिस्थिती असताना मुंबईच्या केईएम रुग्णालयातील एक गैरप्रकार समोर आला आहे. अत्यावश्यक सेवा असल्यामुळे त्या सेवेतील सर्व कामगारांना कामावर येण्याचे आदेश असताना डायलिसिस विभागात मात्र लांब अंतरावर राहणारे कर्मचारी एक दिवसाआड येत आहेत आणि जवळ राहणाऱ्या कर्मचाऱ्यांना मात्र रोज यावं लागत आहे. याबाबत वरिष्ठांशी बोलूनही वरिष्ठ त्याकडे डोळेझाक करत असल्याचा आरोप एक कर्मचाऱ्याने नाव न सांगण्याच्या अटीवर ‘न्यूज18 लोकमत’कडे केला आहे. मुख्य म्हणजे गैरहजर असलेले कर्मचारी दुसऱ्या दिवशी येवून मस्टरवर सही करत आहेत. त्यामुळे सर्व कामगार हजर असल्याचा दिसत आहे. या परिस्थतीमुळे मोजक्याच लोकांवर कामाचा ताण वाढत आहे. शिवाय डायलेसिससाठी आणण्यात आणलेले कोटोना पॉझिटिव्ह रुग्णाचे डायलेसिस मोजक्याच कर्मचाऱ्यांना सुरक्षित किट शिवाय करावा लागत आहे. याबाबत आता काही कारवाई करण्यात येणार का, हे पाहावं लागेल. कोविड 19 पॉझिटिव्ह आणि लक्षणे असलेल्या वयोवृद्ध रुग्णांवर होणार मोठ्या रुग्णालयातच उपचार एकीकडे केईएम रुग्णालयातून हा धक्कादायक प्रकार समोर आला असताना दुसरीकडे उपचारासंदर्भात एक दिलासादायक बातमी आली आहे. मुंबईत कोरोनाच्या 18 रुग्णांचा मृत्यू झाला असून त्यात 60 वर्षांवरील रुग्णांची संख्या मोठ्या प्रमाणात आहे. यामुळे आता कोविड 19 पॉझिटिव्ह आणि लक्षणे आढळलेल्या 60 वर्षांवरील रुग्णांवर महापालिका, राज्य सरकार व खासगी मोठ्या रुग्णालयातच उपचार केले जाणार आहेत. 60 वर्षांखालील आणि लक्षणे नसलेल्या इतर रुग्णांवर मात्र मॅटरनीटी होम, गेस्ट हाऊस, हॉल आदी ठिकाणी सुरू करण्यात आलेल्या विलगीकरण कक्षात उपचार करण्याबाबत मुंबई महापालिका प्रशासनाने प्रमाणित कार्यपद्धती (एसओपी) तयार केली आहे. यासंदर्भात मुंबई महापालिकेकडून परिपत्रक काढण्यात आले आहे. मुंबईमधील पॉझिटिव्ह रुग्णांचा आकडा 278 झाला असून 18 जणांचा मृत्यू झाला आहे. मृतांमध्ये बहुसंख्य रुग्ण हे 60 वर्षांवरील असून या रुग्णांना इतरही आजार असल्याने मृत्यूची संख्या अधिक आहे. यामुळे या रुग्णांची विशेष काळजी घेता यावी म्हणून सर्व सोयी असलेल्या कस्तुरबा, सेंट जॉर्ज, सेव्हन हिल, नानावटी, सैफी या रुग्णालयातच या रुग्णांवर उपचार करण्याचे या एसओपीमध्ये सांगण्यात आले आहे. 60 वर्षाखालील आणि ज्या रुग्णांना लक्षणे दिसून येत नाहीत अशा रूग्णांवर मॅटरनिटी होम बिल्डिंग नागपाडा, लिलावती हॉस्पिटलजवळचे मॅटरनिटी होम, अंधेरी येथील सार्वजनिक बांधकाम विभागाचे गेस्ट हाऊस, डायग्नोस्टिक सेंटर पंजाबी गल्ली, एमसीएमसीआर पवई, अर्बन हेल्थ सेंटर शिवाजी नगर, वांद्रे तलावासमोरील महात्मा गांधी हॉल या ठिकाणी उपचाराकरिता विलगीकरण (आयसोलेशन) सुविधा सुरू करण्यात येणार आहे.
मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.
+6
फोटो
