सर्व गाड्यांना आता 'फास्ट टॅग' सक्तीचे, नाहीतर द्यावा लागेल दुप्पट टोल!

ठाणे 16 डिसेंबर: टोल नाक्यावर वाहनांची गर्दी होवून नागरिकांना त्रास होवू नये याकरता वाहानांना फास्ट टॅगची (Fast Tags) सक्ती करण्यात आलीय आहे. राज्याचे सार्वजनिक बांधकाम मंत्री एकनाथ शिंदे यांनी ही माहिती दिली. ठाण्यात एका कार्यक्रमात ते बोलत होते. टोल नाक्यावर वाहनांकडून टोल घेताना लांबच्या लांब रांगा लागतात त्यामुळे नागरीकांचा नाहक वेळ वाया जातो. जर फास्ट टॅग प्रत्येक वाहनांना लावले गेले तर टोल नाक्यावर वाहकूत कोंडी होणार नाही. त्यामुळे नागरिकांच्या वेळेची बचत देखील होईल आणि टोल नाक्यावर वसूल केल्या जाणाऱ्या पैशांची मोजदाद करणे देखील सोयीस्कर होईल त्यामुळे प्रत्येक गाडीवर फास्ट टॅग असणे गरजेचे आहे असही मत यावेळेस त्यांनी व्यक्त केले. 1 जानेवारी 2021 पासून विना फास्टॅग लावलेल्या गाड्या टोल लेनवरुन गेल्या तर त्यांना दुप्पट टोल द्यावा लागणार आहे. 15 डिसेंबर पासून सर्व टोल नाके कॅशलेस होणार असले तरीही कॅश लेनही सुरु राहतील मात्र त्यांच्याकडून दुप्पट टोल वसूल केला जाणार आहे. खाजगी बॅंका, पेमेंट एपद्वारे देखील फास्ट टॅग मिळवण्याची सुविधा देण्यात आलीय आहे. तसच आता प्रत्येक टोल नाक्यावर टोल चालकांमार्फत फास्ट टॅग काढण्याची सुविधा उपलब्ध केली जाणार असून त्याबाबत जनजागृती ही केली जाणार आहे. मुंबईतील टोल नाके किंवा एक्सप्रेस वे वरील टोल नाके असू देत सर्वच ठिकाणी टोल नाक्यावर टोल वसूलीमुळे मोठी वाहतूक कोंडी होत असते. यामुळे वेळ आणि इंधन तर वाया जातेच पण पर्यावरणाचा देखील -हास होतो. त्यात विनाकारण हाॅर्न वाजवून अनेक वाहन चालक ध्वनी प्रदुषणही करतात तर टोल वरुन वाहन चालक आणि टोल नाक्यावरील कर्मचाऱ्यांमध्ये मारामारी, धक्काबुक्की आणि शिविगाळीचे प्रकार वाढतच जात आहेत. हे सर्व टाळण्यासाठी गेली वर्षभर फास्ट टॅग सक्तीचे करण्यात आले होते. मात्र त्याकडे कोणीही लक्ष दिले नाही. राज्यातील प्रत्येक टोल नाक्यावरुन जाणाऱ्या एकूण गाड्यां पैकी अंदाजे 50 टक्के गाड्यांनीच फास्ट टॅग लावल्याचे आढळून आले आहे. त्यामुळे जोपर्यंत फास्ट टॅग सक्ती केली जात नाही तोपर्यंत टोल नाक्यावरील वाहकूत कोंडी कमी होणार नाही हाच हेतू लक्षात घेवुन आता सर्व गाड्यांना फास्ट टॅग सक्तीचे केले गेले आहे.

• Follow us on