animal markets have been allowed in solapur district सोलापुरातील जनावरांचे बाजार होणार सुरु, 'या' असतील अटी

सोलापूर, 7 जानेवारी : राज्यात लम्पी चर्मरोगाचा प्रादुर्भाव आढळून आल्यामुळे शासन अधिसूचनेनुसार जनावरांचे बाजार बंद करण्यात आलेले होते. मात्र, सोलापूर जिल्ह्यामध्ये गोवंशीय पशुधनास लम्पी चर्मरोगाचे प्रतिबंधात्मक लसीकरण पुर्ण झाल्याने 8 सप्टेंबर 2022 चे आदेशान्वये लागू केलेले निर्बंध अंशतः शिथिल करण्यात आले आहेत. सोलापूर जिल्ह्यात केवळ म्हैसीचा बाजार भरविणे व बाजारात खरेदी विक्रीचे व्यवहार अटी व शर्तीच्या अधिन राहून सुरु करण्याचे आदेश जिल्हाधिकारी मिलिंद शंभरकर यांनी दिले आहेत.

जाहिरात

काय असतील अटी व शर्ती?

जिल्ह्यामध्ये गोवंशीय जनावरांचे (गाय, बैल व वासरे ) बाजार भरविण्यास परवानगी देण्यात आलेली नाही. म्हैसीचा बाजार भरविणे व बाजारात खरेदी विक्रीचे व्यवहार करण्यास परवानगी देण्यात आली असून वाहतुक अधिनियम 2001 मधील प्राण्यांचे वाहतुक नियमांचे पालन करणे व आरोग्य दाखला सोबत असणे बंधनकारक असणार आहे. बाजारामध्ये जंतूनाशक फवारणी करणे बाजार समितीस किंवा आयोजकास बंधनकारक राहील.

Solapur : सिद्धेश्वर यात्रेत योगदंडाचं महत्त्व काय आहे? पाहा Video

यासोबतच राज्यातील अमरावती व नाशिक महसूल विभागातील कोणत्याही जिल्ह्यामधून सोलापूर जिल्ह्यात जनावरांची ने-आण करता येणार नाही. पुणे, औरंगाबाद, नागपूर या महसूल विभागातून केवळ संक्रमित नसलेल्या आणि लसीकरण केलेल्या जनावरांची सोलापूर जिल्ह्यामध्ये ने-आण व वाहतुक करण्यास सक्षम प्राधिकाऱ्याचे आरोग्य प्रमाणपत्र वाहतुकी दरम्यान सोबत असण्याच्या अटीवर परवानगी देण्यात येत आहे.

शेतकऱ्यांनी सहकार्य करावे

सोलापूर जिल्ह्यात जनावरांचे प्रदर्शन भरविण्यास किंवा बैलगाडा शर्यत आयोजन करण्यास कोणतीही परवानगी देण्याचे अधिकार राखून ठेवले असून लम्पी चर्मरोगाची त्या भागातील प्रार्दुभाव व लागण असल्याचे प्रमाण विचारात घेऊन परिस्थितीनिहाय परवानगी देण्याची कार्यवाही करण्यात येईल. प्रस्तुत नियमावली ही जिल्ह्यात काटेकोरपणाने पाळण्यात यावी आणि या लंम्पी रोगाचा प्रादुर्भाव तात्काळ खंडित झाला पाहिजे. यासाठी प्रशासनास प्रत्येक गाय पशुधन असणाऱ्या शेतकऱ्यांनी सहकार्य करावे, असे आवाहन जिल्हाधिकारी मिलिंद शंभरकर यांनी केले आहे.

मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.

Tags: agriculture , farmer , Local18 , solapur