25 एप्रिलला सुट्टीवर येणार होते.... पण वाशिमच्या सुपूत्राला आलं वीरमरण, पॅरा कमांडो अमोल गोरे अरुणाचल प्रदेशमध्ये शहीद

किशोर गोमाशे, प्रतिनिधी वाशिम, 18 एप्रिल : भारतीय सैन्य दलात पॅरा कमांडो म्हणून कार्यरत असलेले वाशिम जिल्ह्याचे सुपूत्र अमोल गोरे हे भारत चिन सीमेवर अरुणाचल प्रदेश येथे बचाव कार्य करीत असताना शहीद झाले आहेत. भारत चीन सीमेवरील अरुणाचल प्रदेश कामेंग येथे बचाव कार्यादरम्यान, दोन जवानांना वाचवताना त्यांना वीरमरण आलं आहे.  त्यांच्यावर उद्या 19 एप्रिल रोजी सकाळी 10 ते 11 चे दरम्यान वाशिम जिल्ह्यातील सोनखास या त्यांच्या मुळगावी शासकीय इतमामात अंत्यसंस्कार होणार असल्याची प्राथमिक माहिती आहे. दरम्यान, शहीद जवान अमोल गोरे हे देशसेवेसाठी सैन्यदलात दाखल झाले होते आणि पॅरा कमांडो म्हणून कार्यरत होते. याआधी झालेल्या अनेक महत्वपूर्ण अभियानात त्यांनी सहभाग घेऊन देशसेवा केली होती. 25 एप्रिलला ते सुट्टी घेऊन गावी येणार होते. मात्र, त्याआधीच त्यांना देशसेवा करताना वीरमरण आलं. अमोल यांच्या पश्चात 4 वर्षांचा मुलगा, पत्नी, आई-वडील, भाऊ, बहीण असा मोठा परिवार आहे. अमोल सारख्या धाडसी व मनमिळावू जवानाच्या शहीद होण्यानं वाशिम जिल्ह्यात हळहळ व्यक्त होत आहे. सोनखास गावातील सुपुत्र अमोल गोरे हे 14 एप्रिलला भारत-चीन सीमेवरील अरुणाचल प्रदेश या ठिकाणी युनिट 11 SF पॅरासैनिक पेट्रोलिंगमध्ये कर्तव्य बजावत होते. यावेळी त्यांच्या सोबतचे दोन जवान सकाळी 4 वाजता पहाडीवरुन घसरल्यामुळं बर्फात दबले होते. त्या दोन जवानांना वाचवण्यासाठी अमोल गोरे यांनी पहाटे 4 वाजता बर्फामध्ये उडी घेतली. त्यात त्या दोघांना वाचविण्यात आलं. मात्र, या बचाव कार्यात वाशिम जिल्ह्याचे सुपुत्र अमोल गोरे यांना वीरमरण आलं. त्यांच्यावर उद्या 19 एप्रिल रोजी सकाळी 10 ते 11 चे दरम्यान वाशिम जिल्ह्यातील सोनखास या त्यांच्या मुळगावी शासकीय इतमामात अंत्यसंस्कार होणार असल्याची प्राथमिक माहिती आहे.

• Follow us on